Túrkistanda mas jolaýshy taksı júrgizýshiniń betine shanyshqy tyǵyp alǵan
TÚRKІSTAN.QazAqparat – Túrkistan qalasynda taksıge mingen jolaýshylar júrgizýshini qorqytyp, betine shanyshqy tyǵyp alǵan. Eki jolaýshydan taıaq jegen júrgizýshi kóligin toqtatyp, áreń degende qashyp qutylǵan, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, Túrkistan qalalyq polıtsııa bólimine taksı júrgizýshisi aryzdanǵan.
Onyń sózinshe, oqıǵa 12 aqpan tańǵy saǵat 7:15 shamasynda bolǵan. Belgisiz eki adam telefon arqyly taksı shaqyrǵan soń júrgizýshi kóligimen jetip barǵan. Kólikke otyrǵan jolaýshylardyń biri mas bolǵan. Ol jolda taksıske tıisken. Qaltasyndaǵy shanyshqymen betin jaraqattaǵan soń jábirlenýshi qashýǵa májbúr boldy.
Tártip saqshylary qylmyskerlerdi jarty saǵat ishinde izin sýytpaı qolǵa túsirdi. Olar jábirlenýshiniń kóligin áli minip júrgen eken. Tergeý barysynda eki kúdikti de jergilikti turǵyndar bolyp shyqty.
«Atalǵan jaıt QR QK 200-baby («Avtomobıldi nemese ózge de kólik quralyn jymqyrý maqsatynsyz zańsyz ıelený») boıynsha tirkeldi. Kúdiktilerdiń biri qamaýǵa alynyp, ekinshisi qolhatpen bosatyldy. Qazirgi tańda sotqa deıingi tergeý júrip jatyr» delingen habarlamada.
