Túrkistanda mas kúıinde kólik júrgizgen 7 adam jaýapqa tartyldy
TÚRKІSTAN. QazAqparat – Túrkistan qalasynda jyl basynan beri mas kúıinde kólik basqarǵan 7 júrgizýshi ákimshilik jaýapkershilikke tartyldy. Kezekti reıdtik shara kezinde jergilikti polıtsııa qyzmetkerleri eki myńnan astam ákimshilik quqyq buzýshylyqty anyqtady, dep habarlaıdy QazAqparat tilshisi.
Oblystyq PD baspasóz máslıhatynyń málimetinshe, kúndizgi jáne túngi reıdtik is-sharalar kezinde jol qozǵalysy erejelerin buzýǵa qatysty 1614 jáne qoǵamdyq tártipti buzý boıynsha 269 jáıt tirkelgen. Aıyppul turaǵyna 186 tártip buzýshynyń avtokóligi qoıylǵan.
Bir quqyqbuzýshy joldyń qarsy betine shyqqany úshin jáne taǵy bir júrgizýshi jalǵan memlekettik nómirlik belgileri bar kólik quralyn júrgizgeni úshin jaýapkershilikke tartyldy.
Sondaı-aq, reıdtik is-sharalar barysynda ıývenaldy polıtsııa qyzmetkerleri túngi ýaqytta úıden tys jerde júrgen 39 jasóspirimdi anyqtap, usaq buzaqylyq jasaǵan 55 adamǵa shara qoldandy.
