Túrkistanda MÁMS júıesin engizý máselesi talqylandy
TÚRKІSTAN. QazAqparat – Túrkistan oblysynda MÁMS júıesin engizý daıyndyǵyn qamtamasyz etý úshin jedel ózara is-qımyl jónindegi óńirlik shtab otyrysy ótti, dep habarlaıdy QazAqparat tilshisi.
Jıyn barysynda oblys ákiminiń orynbasary Joldymurat Amanbaev aımaqtaǵy jasalyp jatqan jumys barysyna toqtaldy.
Jıynda sóz alǵan sala mamandarynyń sózinshe, oblys halqynyń 97,6% qazirgi tańda MÁMS júıesinde shartty túrde saqtandyrylǵan. «Shartty túrde saqtandyrylmaǵan» sanatynda oblys halqynyń 2,4% - y nemese 47 myńǵa jýyq adam bar. Olar boıynsha mártebeni ózektendirý jumystary jýyq arada aıaqtalady. Jalpy, barlyq azamattar medıtsınalyq saqtandyrý júıesinde tıisti kómekterdi alýyna qajetinshe jaǵdaı jasalady. Búginde turǵyndardyń óz betimen jarna aýdarýyn júıege qatysýshy barlyq medıtsınalyq uıymdarda tólem termınaldaryn ornatý josparlanyp otyr. Jınalysqa qatysqan REDSO bas dırektorynyń orynbasary Menhanym Qaldybaeva men óńirlik shtabtyn músheleri de osy baǵytta atqarylyp jatqan jumystar barysyn baıandady. «Áleýmettik medıtsınalyq saqtandyrý qory» KEAQ Túrkistan oblysy boıynsha fılıalynyń dırektory Ashat Beısenbaevtyń sózinshe, atalǵan júıe engizilgen jaǵdaıda barlyq tóleýshiler úshin tıimdi bolmaq. Azamattar, jumys berýshiler jáne memleket densaýlyq úshin ortaq jaýapkershilikte bolady.
Sonymen qatar, medıtsınalyq saqtandyrýdyń barlyq qatysýshylary medıtsınalyq qyzmettiń biryńǵaı saqtandyrý paketine teń qoljetimdilikke ıe bolady.
«Eshkim medıtsınalyq kómeksiz qalmaıdy. Saqtandyrylǵan azamattar tólengen jarnalardyń kólemine qaramaı, qymbat medıtsınalyq qyzmetterdi ala alady. Qazir sanaty anyqtalmaǵan azamattarmen medıtsınalyq saqtandyrý týraly aqparattyq-túsindirý jumystary júrgizilýde, - dedi Ashat Beısenbaev.
Sondaı-aq fılıal dırektorynyń aıtýynsha, jańa djyldan bastap bastapqy medıtsınalyq-sanıtarlyq kómekti basym qarjylandyrý qamtamasyz etildi.
«Mektep medıtsınasyn qarjylandyrý qarastyrylyp, konsýltatsııalyq-dıagnostıkalyq kómek pen medıtsınalyq ońaltýdy qarjylandyrý kólemi aıtarlyqtaı keńeıtilgen. Búginde Fılıal TMKKK jáne MÁMS sheńberinde qyzmetter paketteri jáne bıznes-protsester boıynsha oqý jumystary júrgizilip, aımaqta 428 spıker jáne 24 372 medıtsına qyzmetkerleri oqytýdan ótken»,- dedi Ashat Beısenbaev.
Sondaı-aq, jumysshy top shara aıasynda oblystyq klınıkalyq aýrýhanasynda, týberkýlezge qarsy kúres dıspanserinde, Ordabasy, Otyrar, Túrkistan ortalyq aýrýhanalarynda jáne Túrkistan qalalyq emhanasyndaǵy MÁMS boıynsha jasalyp jatqan daıyndyq sharalarynyń jaı-kúıimen tanysty.
