Túrkistanda MÁMS aıasynda kórsetilgen qyzmetterge 16 mlrd teńge tólendi

TÚRKІSTAN. QazAqparat – Túrkistan oblysyndaǵy medıtsınalyq uıymdarda Mindetti áleýmettik medıtsınalyq saqtandyrý (MÁMS) paketinde kórsetilgen qyzmetterge 16,9 mlrd teńge tólendi. Bul jóninde «Áleýmettik medıtsınalyq saqtandyrý qory» KEAQ Túrkistan oblysy boıynsha fılıalynan málim etti, dep habarlaıdy QazAqparat tilshisi.

Sala mamandarynyń aıtýynsha, oblys boıynsha jumys berýshiler tarapynan 4,3 mlrd teńge tólengen. Al, jeke kásipkerler tarapynan 2,4 mlrd teńge, 260 mln teńge BJT bólingen.

«Qazirgi ýaqytta elimizde emhanalarǵa tirkelý naýqany júrip jatyr. Naýqan barysynda medıtsınalyq uıymdarda tirkelgen turǵyndarǵa baılanysty kelesi jylǵa qarjylandyrý josparlanatyn bolady. Osyǵan oraı, Qor úshin árbir turǵynnyń emhanaǵa tirkelgeni jón. Óıtkeni Qor árbir tirkelgen turǵyn úshin aı saıyn medıtsınalyq uıymdarǵa kórsetilgen qyzmetke baılanysty qarjy bóletin bolady», - deıdi Qordyń Túrkistan oblysyndaǵy fılıal dırektory Ashat Beısenbaev.

Fılıal dırektorynyń sózinshe, shyǵyndardyń basym bóligi statsıonarlyq medıtsınalyq kómek tólemi – 4,9 mlrd teńgeden astam jáne aýyldaǵy statsıonarlar qyzmeti úshin- 3,5 mlrd teńgeni quraǵan. Al, 8 aıda josparly túrde statsıonarlarda 72 myńnan astam qyzmet kórsetilgen. Konsýltatsııalyq-dıagnostıkalyq kómek kórsetkeni úshin medıtsınalyq uıymdarǵa 5,9 mlrd teńge tólengen. Aıta ketý kerek, KT jáne MRT qyzmetterine patsıentter tarapynan suranys artqan. Kúni búginge deıin patsıentterge KT jáne MRT 1 640-tan astam qyzmet kórsetilgen.

«Qor fılıaly halyqqa joǵary tehnologııalyq qyzmet kórsetkeni úshin 38 mln teńgeden astam qarjy tóledi. Atalmysh qyzmetterdi 19 adam aldy. Sonymen qatar, statsıonardy almastyratyn kómekke 748 mln teńge tólendi. Munan bólek, 103 myńnan astam kórsetilgen stomatologııalyq qyzmet úshin 300,4 mln teńge tólendi. Infarkt, ınsýlttan soń, 4494 myńǵa jýyq patsıentke medıtsınalyq ońaltý sharalary kórsetildi», - deıdi Ashat Beısenbaev.