Túrkistanda Maǵjan Jumabaevtyń ómiri jaıly qoıylym sahnalandy
TÚRKІSTAN. QazAqparat - Túrkistandaǵy Raıymbek Seıtmetov atyndaǵy sazdy drama teatrynda Dýlat Isabekovtiń «Óıtpese Maǵjan bolama?» atty spektakli sahnalandy. Tarıhı qoıylym saıası qýǵyn-súrgin jáne asharshylyq qurbandaryn eske alý kúnine oraı kórermenge usynyldy, dep habarlaıdy QazAqparat tilshisi.
Spektaklde Alashtyń arysy, aqıqattyń aldaspanyna aınalǵan Maǵjan Jumabaevtyń jastyq shaǵynan bastap ómiriniń sońǵy kezeńine deıingi ómir joly kórsetiledi. Qazaq jastaryna zor senim artqan daryndy aqynnyń abaqtydaǵy azapty ǵumyry men jubaıy Zylıhaǵa degen adal mahabbaty sýretteldi. Qoıylymda Maǵjan Jumabaevtyń rólin Ǵalymjan Jaqypov somdasa, Zylıha Jumabaevany Kámshat Ashtekova oınady. Qoıylymnyń rejısseri - Aıdar Naýryzbaev.
Alǵashqy qoıylymǵa Túrkistan oblysy Mádenıet jáne tilderdi damytý basqarmasynyń basshysy Nurdáýlet Isabek pen zııaly qaýym ókilderi, mádenıet salasynyń qyzmetkerleri men qala turǵyndary qatysty. Sondaı-aq, jergilikti jastar shaqyrylyp, ult zııalylarynyń jarqyn bolashaqty kóksegen qarbalas tarıhy men tálkekke toly taǵdyry týraly tebirene tamashalady.
«Qoıylymnyń sońyna deıin Maǵjan Jumabaevpen birge ómir súrgendeı áserge bólendim. Kózimnen jas ketpedi. Qazaqtyń eńsesin tik kóterer qanshama asyl azamattarymyz jazyqsyz qurban bolyp, japa shekkenine ókinesiń. Áıelderdiń myqtylyǵyna súısinesiń. Abaqtyda jatqan Maǵjanǵa kún-túnge qaramaı áreń jetken jary Zylıhanyń sonda da qıyndyqqa moıymaı «Qamys ishinde batpaǵyna aýnap jetsem de jaryma degen adal mahabbat sol joldy jumaqqa kele jatqandaı kúıge bóleıdi» dep aıtqan sózderiniń ózinde tunyp jatqan danalyq pen tektilik jatyr. Kitaptan maqurym bolyp bara jatqan búgingi qoǵamnyń jastary osyndaı qoıylymdardan úlgi alýy kerek», - deıdi QR Mádenıet qaıratkeri, zeınet jasyndaǵy mádenıet maıtalmany Uljalǵas Ábenqyzy.
Sahnalyq shyǵarmada sonymen qatar, aqynnyń ómiri men eldiń taǵdyry, ult zııalylarynyń bastan keshkenderi men bir-birine degen qoldaýy kórsetilgen. Er men áıel arasyndaǵy adal mahabbat baıan etilgen qoıylymda basty keıipker jarynyń óleńin sońǵy ret qaıtalaı otyryp, shyndyq pen saǵynyshty kókireginde qattaǵan Zylıha ananyń ólim qushaǵyna enýimen aıaqtaldy.
