Túrkistanda lımon ósirem degender arnaıy kýrstan ótedi

TÚRKІSTAN. QazAqparat - Túrkistan oblysynda lımon ósirý isin jandandyrýǵa arnalǵan oqytý kýrsy ashylady, dep habarlaıdy QazAqparat óńirlik kommýnıkatsııalar qyzmetine silteme jasap.

Túrkistandyq kásipker Nursultan Júsipbaev birneshe jyldan beri lımon ósirýmen aınalysady. 1 gektardy qamtıtyn lımon baǵyna 2200 túp lımon kósheti otyrǵyzylǵan.

Kásipker byltyr jylyjaıda 4 tonna ónim óndirgen. Jospar boıynsha bıylǵy meje 12 tonnaǵa jetýi yqtımal. Lımon baǵynda 30 shaqty baǵban jumys isteıdi.

«Lımon aǵashynyń kútimine aıryqsha kóńil bólinip ósirilgen jaǵdaıda bir túbi 150-200 kelige deıin ónim beredi. 1 keli lımonnyń kóterme baǵasy 1000 teńgege deıin baǵalanady. Bul 3-4 jyldyń shyǵynyn óteýge jáne tabysqa kenelýge jetkilikti. Suranysqa ıe ónim negizinen ishki naryqta saýdalanýda», - deıdi «Iassy» konsortsıýmynyń basshysy Nursultan Úmbetuly.

Túrkistan oblystyq kásipkerler palatasynyń dırektory Tımýr Naqypbekovtyń sózinshe, atalǵan bıznestiń qarajat qaıtarymdylyǵy men tıimdiligi joǵary.

Búginde kóp ýaqyt pen shydamdylyqty qajet etetin kásip túrine qyzýǵýshylyq artqanymen, kútip-baptaý isinde bilikti mamandar tapshy.

Óńirde lımon ósirý kásibimen aınalysatyn kásipkerler men qajetti jumysshylardy tájirıbeden ótkizý baǵytynda tıisti sharalar qolǵa alynbaq.

ıAǵnı, bilikti mamandar daıarlaý úshin «Atameken» kásipkerler palatasynyń oblystyq fılıaly men «Iassy» konsortsıýmy arnaıy oqytý kýrstaryn uıymdastyrady.