Túrkistanda qyzǵaldaqtar kórmesi ótedi
TÚRKІSTAN. QazAqparat- Túrkistanda qyzǵaldaqtar kórmesi uıymdastyrylyp, onda óńirdegi barlyq qyzǵaldaq túrleri kelýshiler nazaryna usynylmaq. Bul týraly «Syrdarııa-Túrkistan» memlekettik óńirlik parkiniń týrızm, rekreatsııa jáne ekologııalyq aǵartý bóliminiń basshysy Ǵanı Nazarbek málim etti, dep habarlaıdy QazAqparat tilshisi.
Sala mamanynyń sózinshe, jýyq arada búr jaratyn qyrmyzy qyzǵaldaqtardy julǵandarǵa zań aıasynda jaýapkershilik qarastyrylǵan. Sondyqtan taý bókterinde jaıqala ósken dala gúlderine, tabıǵatqa zııan tıgizbegen abzal.
Ǵanı Nazarbek sonymen qatar óńirlik park aýmaǵynda ótken jyly 14 orman órti oqıǵasy tirkelgenin atap ótti. Al, suǵanaqtyqqa qatysty 300 ret reıd júrgizilip, 152 zań buzýshylyq jáıti anyqtalǵan.
«Zańsyz ań aýlaý, orman zańdylyqtaryn jáne balyq qoryn qorǵaý erejelerin buzý deregimen 130 oqıǵa boıynsha 1 mln 93 myń teńge kóleminde aıyppul salyndy. Bıyl da jyl basynan beri 40 ret reıd jumystary júrgizilip, 19 zańbuzýshylyq jáıti anyqtalǵan. Óńirlik tabıǵı parkke qarasty 5 turaqty jáne 1 ýaqytsha orman tuqymbaǵynda búgingi tańda 1 742 016 myń dana standartty kóshetter ósirilýde. Tuqymbaqtardyń jalpy kólemi 56 gektardy quraıdy. Parkte sútqorektilerdiń shamamen 46 túri mekendeıdi. Onyń ishinde tas sýsary, arqar, úndi jaırasy, aq baýyr jarqanat, keńqulaqty jarqanat Qazaqstannyń Qyzyl kitabyna engen. Ósimdikterdiń shamamen 850 túri bolsa, onyń 42 túri Qazaqstannyń Qyzyl kitabyna engen», - dedi Memlekettik óńirlik tabıǵı parkiniń mamany.
Aıta keteıik, óńirdegi parkte týrıstik baǵyttaǵy jalpy uzyndyǵy 162,85 shaqyrym aýmaq bar. Ótken jyly park aýmaǵyna 4 myńǵa jýyq adam kirgizilip, kórsetilgen qyzmet kólemine saı park esep-shotyna 1 090 876 teńge qarjy túsken.
