Túrkistanda qyz uzatý jasaǵandar jaýapqa tartyldy
TÚRKІSTAN. QazAqparat – Túrkistanda turǵyndar karantındik shekteý sharalaryn saqtamaı, qyz uzatý toıyn jasaǵan. Óńirde kúsheıtilgen erejeni elemegenderdi polıtseıler anyqtap, ákimshilik jaýapqa tartty, dep habarlaıdy QazAqparat tilshisi.
Oblystyq PD baspasóz qyzmetiniń málimetinshe, Túrkistan QPB-na qala ortalyǵyndaǵy Táýke han kóshesi boıynda ornalasqan dámhanalardyń birinde qyz uzatý toıy ótip jatqandyǵy týraly habarlama túsken. Oqıǵa ornyna kelgen mobıldik top pen polıtseıler toıdyń ótip, aıaqtalǵanyn anyqtaǵan. Biraq toıhana ıesi toı-jıyn ótkizýge tapsyrys qabyldaǵanyn moıyndaǵan. Kásipker men toı ıesi zańbuzýshylyqqa jol berip, jalpyǵa ortaq erejeni buzǵany belgili bolǵan.
«Atalǵan jaıt QR ÁQBtK-niń 425-babymen tirkelip, is-qujattary jınaqtalyp, Túrkistan qalalyq taýarlar men kórsetiletin qyzmetterdiń sapasy men qaýipsizdigin baqylaý basqarmasyna zańdy sheshim qabyldaý úshin joldandy» delingen habarlamada.
Aıta keteıik, óńirde karantındik tártipke qaramastan toı-jıyn men basqosýlar, merekelik jáne ujymdyq is-sharalardy uıymdastyrýshylar qatary azaıar emes. Jýyrda ǵana polıtseıler Túrkistan qalasyndaǵy «Bek» dámhanasynda 30 adamǵa ujymdyq is-sharaǵa tapsyrystar qabyldap, jıyn ótkizgen azamattardy anyqtaǵan bolatyn. Búginde bul zańbuzýshylyq boıynsha da jınaqtalǵan qujattar zańdy sheshim shyǵarý úshin tıisti organdarǵa jiberilgen.
