Túrkistanda kúzet agenttiginiń keńsesinen qarý urlandy
TÚRKІSTAN. QazAqparat - Túrkistan oblysynda qaraqshylar kúzet agenttiginiń keńsesinen qarý urlap ketken, dep habarlaıdy QazAqparat Polisia.kz saıtyna silteme jasap.
Túngi ýaqytta Túrkistan qalalyq polıtsııa basqarmasynyń kezekshi bólimine kúzet agenttikteriniń biriniń keńsesinen atys qarýy urlanǵany týraly habarlama túsken.
«Oqıǵa ornyna qalalyq polıtsııa basqarmasynyń basshylyǵy bastaǵan jedel-tergeý toby shyqty. Polıtsııa qyzmetkerleriniń anyqtaýynsha, belgisiz adamdar kúzet agenttigi ornalasqan ǵımaratqa kirip, seıfti ashyp, oqtary bar «Saıga» ańshylyq myltyǵyn urlap ketken. Sonymen qatar, urylar kórshi keńselerden eki noýtbýkty qoldy qylǵan. Atalǵan jaıttar QR QK-niń 188-baby 3-bóligi (Urlyq) jáne 287-baby 1-bóligi (Qarýdy, oq-dárilerdi, jarylǵysh zattar men jarylǵysh qurylǵylardy zańsyz satyp alý, berý, ótkizý, saqtaý, tasymaldaý nemese alyp júrý) boıynsha Sotqa deıingi tergep-tekserýdiń biryńǵaı tizilimine tirkeldi», - delingen polıtsııa aqparatynda.
Málim etilgendeı, qarý-jaraq pen basqa da baǵaly zattardy urlaǵan kúdiktilerdi ustaý maqsatynda Túrkistan qalasynyń polıtseıleri jaqyn mańdaǵy aýmaqtardy aralap, vıdeobaqylaý kameralaryn muqııat teksergen.
«Polıtseıler vıdeokameralardyń birinen túngi ýaqytta sómkelerine aýyr zat salyp alyp júrgen eki jaıaý adamdy baıqaǵan. Alynǵan aqparattyń arqasynda krımınaldyq polıtsııa qyzmetkerleri izdestirý is-sharalaryn jalǵastyryp, bir apta ishinde urylardyń izine tústi. Odan ári jedel-izdestirý is-sharalarynyń nátıjesinde tártip saqshylary urlyq jasaǵan kúdiktilerdi ustady. Kúdiktiler Otyrar aýdanynyń turǵyndary, jas jigitter bolyp shyqty. Óz kinálaryn tolyq moıyndady», - delingen baspasóz baıanynda.
Urylar urlanǵan qarýdy tanysyna satyp, noýtbýktardy Shymkent qalasyndaǵy lombardqa ótkizgen. Al aqshany óz qajettilikterine jumsaǵan.
Kúdiktiler qamaýǵa alyndy.
