Túrkistanda kúrdeli jóndeýden ótken saıabaq el ıgiligine berildi
TÚRKІSTAN. QazAqparat - Túrkistan qalasynda kúrdeli jóndeýden keıin tolyqtaı jańa keıipke engen «Jeńis saıabaǵy» paıdalanýǵa berildi, dep habarlaıdy Túrkistan oblysy ákiminiń baspasóz qyzmeti.
Jańa demalys ornynyń saltanatty ashylýyna oblys ákimi Ómirzaq Shókeev qatysyp, qala turǵyndary men qonaqtaryn quttyqtady.
«Tegi bir, tarıhy ortaq túrki elderiniń túp qazyǵy kıeli shaharymyz - Túrkistan shahary kún sanap kórkeıip keledi. Jańa jyl qarsańynda el ıgiline berilgen jańa saıabaq az ǵana ýaqyttyń ishinde jańa keıipke enip, tasjoldar tóselip, aınalasy abattandyryldy. Sáni men sáýleti kelisken nysan endi halyq serýendeıtin súıikti mekenge aınalary sózsiz. Barshańyzǵa qýanyshty bólisýge kelgenderińiz úshin alǵys aıtamyn. Kele jatqan Jańa jyl merekesimen quttyqtaımyn. Keler jyl da halqymyzǵa qut-bereke, beıbitshilik, januıalaryńyzǵa shattyq ákelsin! Yntymaq pen birlik aıasynda elimizdiń odan ári damýy jolynda bir kisideı eńbek eteıik», - dedi oblys ákimi.
Biraz jyldar qańyrap bos turǵan úlken aýmaq, az ǵana ýaqyttyń ishinde adam tanymastaı jańasha keıipke endi. Kúrdeli jóndeýden ótken «Jeńis saıabaǵynda» kógaldandyrý jumystary júrgizilip, 3000 sharshy metrge granıtti tósegishter tóseldi. 2500 aǵash otyrǵyzylyp, aınala tolyq túrli – tústi shamdarmen jaryqtandyrylǵan. Shahmattyq dızaında qurǵaq fontan salynyp, tasjoldar tóselip, jastarǵa arnalǵan zamanaýı skeıt - park pen fýtbol alańy iske qosyldy.
«Jańa jyl-jarqyn bastama» atty erekshe dýmandy keshke ulasqan merekelik keshte elimizdiń tanymal ánshileri Qaırat Nurtas, Qaırat Túntekov, Sara Amangeldi men «Saryn», Alem Band toptary óner kórsetti.
