Túrkistanda Kúltegin, Alty alash, Elim-aı atty kósheler paıda bolady
Aımaq basshysy Túrkistan qalasyna kóship kelgen bir aıda qarqyndy jumys júrgizilip jatqanyn atap ótti. Týrıstik áleýeti joǵary shahardyń damýyna Elbasynyń tikeleı nazar aýdaryp, kóńil bólip otyrǵanyn jetkizdi. Máselen, qalaǵa ótken jyly 1 mln 190 myńnan astam týrıst pen zııaratshy kelgen bolsa, aldaǵy ýaqytta olardyń sanyn kóbeıtý kózdelip otyr. Alaıda, ol úshin qalaǵa jańa áýejaı, temir jol vokzaly men avtovokzal servıstik qyzmet kórsetetin áleýmettik-mádenı nysandar salý qajet. 
«Tashkent-Túrkistan-Tashkent baǵytynda qatynaıtyn júrdek poıyz, Tashkent-Túrkistan-Tashkent baǵytynda avtobýs marshrýtyn ashý boıynsha aldyn ala Ózbekstan tarapymen kelisilip, QR Investıtsııa jáne damý mınıstrligine joldandy. Qajetti jobalardyń barlyǵy Keshendi jospar jobasyna engizilip, QR Ulttyq ekonomıka mınıstrligine usynyldy. Túrkistan qalasynda salynatyn jańa nysandar úshin qazandyq pen 3 podstantsııa qurylysyn júrgizýdi josparlap otyrmyz. Sý, gaz máseleleri jedel qolǵa alynady. Turǵyn úı máselesin shuǵyl sheshý úshin jergilikti bıýdjet esebinen Túrkistan jáne Kentaý qalalarynda 1956 páterli 33 turǵyn úıdiń qurylysy bastalyp ketti. Men oblys kásipkerlerin Túrkistan qalasyna ınvestıtsııa salyp, óz jumystaryn júrgizýge taǵy da shaqyramyn. Ákimdik tarapynan qoldaý bolady. Bas jospar qabyldanǵannan keıin Túrkistanda qurylys qarqyn alady»,- dedi Janseıit Túımebaev.
Jıynda budan ózge birneshe ózekti máseleler talqylandy. Olardyń qatarynda aty joq 330 kóshege ataý berý jaıy sóz boldy. Sala mamandary keńes múshelerine osy kóshelerge Kúltegin, Qaztýǵan jyraý, Hanqorǵan, Alty Alash, Máńgilik El, Elim-aı, Bolat han, Kúltóbe sııaqty ataýlar beriletinin jetkizdi.
