Túrkistanda koronavırýstyń ekinshi tolqynyna daıyndyq jumystary júrgizilýde
NUR-SULTAN. QazAqparat - Búgingi tańda Túrkistan oblysynda epıdemıologııalyq jaǵdaı turaqty. Degenmen, oblystyń barlyq medıtsınalyq mekemelerinde koronavırýstyq ınfektsııamen kúres jumystary bekitilip, ekinshi tolqynyna daıyndyq jumystary júrgizilýde, dep habarlaıdy QazAqparat.
Іndettiń órshýi oryn ala qalǵan jaǵdaıda medıtsına qyzmetkerleri daıyn bolýy tıis. Oblystyq qoǵamdyq densaýlyq basqarmasynyń málimetinshe, bul maqsatta jergilikti bıýdjet pen gýmanıtarlyq kómek arqyly 800-ge jýyq otttegi kontsentraty alynǵan. Qarqyndy terapııa palatalary bir jarym myńǵa jýyq ottegi núktelerimen jasaqtalǵan.
Epıdemıologııalyq jaǵdaı eskerile otyryp, oblystyń medıtsınalyq uıymdary men «SK-Farmatsııa» JShS-i arasynda dárilik zattar men medıtsınalyq buıymdardy jetkizip berýge qosymsha kelisim-sharttar jasalynǵan. Mamandar qazirdiń ózinde 2 aıǵa jetetin jeke qorǵanys quraldarymen qamtamasyz etilgen.
Oblysta jalpy koronavırýs ınfektsııasyna táýliktik qýattylyǵy úsh myńǵa jýyq synamany quraıtyn 12 zerthana jumys isteýde. Kúni búginge deıin 130 myńnan astam adam test tapsyrǵan. Onyń ishinde Covid-19 ınfektsııasy rastalǵan 3343 jaǵdaı tirkelgen. Naýqastardyń 96 paıyzy, ıaǵnı 3210 adam jazylyp shyqty. Búgingi kúnge bir kúndik ósim 0,1 paıyzdy qurap, aýrýshańdyqtyń tómendegeni de baıqalady.
Oblys boıynsha ınfektsııalyq statsıonarlarda búgingi tańda koronavırýsqa qarsy emdeý sharalary úshin 600 tósek – oryn daıyndalǵan. Túrkistan qalasynda 200 orynǵa eseptelgen modýldi juqpaly aýrýlar aýrýhanasy boı kóteredi. Koronavırýs jáne pnevmonııa indetterimen kúresý maqsatynda alǵashqy medıtsınalyq – sanıtarlyq kómek kórsetetin uıymdarda quramynda dáriger men orta býyn medıtsına qyzmetkerleri jumyldyrylǵan 380 mobıldi top jumys isteýde. Sondaı-aq, medıtsınalyq uıymdarda ashylǵan 20 Call-ortalyqtary turǵyndar tarapynan týyndaǵan suraqtarǵa jaýap berip, ózekti másleler boıynsha túsindirý jumystaryn júrgizýde.
