Túrkistanda kópqabatty úı órtenip, turǵyndar qaýipsiz jerge shyǵaryldy
TÚRKІSTAN. QazAqparat – Túrkistan qalasynda kópqabatty úı órtenip, turǵyndar qaýipsiz jerge shyǵaryldy, dep habarlaıdy QazAqparat QR ІІM Tótenshe jaǵdaılar komıtetine silteme jasap.
QR ІІM Tótenshe jaǵdaılar komıteti baspasóz qyzmetiniń málimetinshe, búgin keshkisin saǵat 18:30-dar shamasynda 101 pýltine shaqyrý kelip túsken. Turǵyndar Botkın kóshesindegi eki qabatty úıdiń órtenip jatqanyn habarlaǵan. Oqıǵa ornyna oblystyq TJD 20 sóndirýshisi men 8 tehnıkasy jumyldyrylǵan. Órt sóndirýshiler jalynnyń tórt páterdi sharpyp, shatyrǵa ótkenin baıqaǵan. Olar jedel 18 adamdy arnaıy satylarmen tómen túsirip aldy. Qutqarylǵan turǵyndardyń arasynda 6 bala bolǵan.
«Shuǵyl áreket jasaýdyń arqasynda órt 19:35-te aýyzdyqtalyp, 19:48-de tolyqtaı sóndirildi. Jalyn 270 sharshy metr jerdi sharpyǵan. Órtten eshkim zardap shekken joq. Qazir órttiń shyǵý sebepteri anyqtalýda», - delingen TJK habarlamasynda.
