Túrkistanda kópqabatty 88 turǵyn úı salynady
TÚRKІSTAN. QazAqparat - Búgin Túrkistan qalasynda oblys ákimi Janseıit Túımebaevtyń qatysýymen jańa ákimshilik-iskerlik ortalyqta ornalasqan «Túrkistan-jańa qala» turǵyn úı alabynyń qazyǵy qaǵylyp, irgetasy qalandy.
Aýmaǵy 38 gektar bolatyn shaǵyn aýdanda 88 kópqabatty turǵyn úı salý josparlanǵan, dep habarlaıdy QazAqparat tilshisi.
Munda barlyǵy «Otyrar», «Syrdarııa», «Arman» jáne «Saýran» atty 4 turǵyn úı kesheni salynbaq. Jańadan boı kóteretin baspanalardyń 44-i 2019 jyly paıdalanýǵa berilse, qalǵan 44 úı 2020 jyly el ıgiligine tapsyrylady dep kútilýde. Turǵyndar 2724 páterge, 196 285 sharshy metr alańdy alatyn úılerge qonystanatyn bolady. Bul qurylystardy júrgizýge «Ońtústik qurylys servıs» men «Beren», «Shymkent qurylys» jáne «NK Building» seriktestikteri qatystyrylmaq.
Qurylystyń basyna arnaıy kelgen aımaq basshysy Janseıit Túımebaev Túrkistan qalasyn damytý boıynsha iri jobalar qolǵa alynyp jatqanyn atap ótti.
«Qadirli túrkistandyqtar! Elbasy Jarlyǵymen oblys ortalyǵy kóne Túrkistanǵa aýysqaly úlken ózgeristerge bet burdyq. Búgin «Túrkistan» áleýmettik kásipkerlik korporatsııasy men jeke ınvestıtsııa esebinen boı kóteretin turǵyn úılerdiń qurylys jumystaryna bastaımyz. Munda 2-inshi jáne 3-inshi klasstaǵy 2724 páter bar. Osy baspanalar «Nurly jer» jáne «7-20-25» baǵdarlamasy aıasynda júzege asady. Birer jylda oblys ortalyǵy jańa kelbetke enedi. Qurylys jumystaryna otandyq ónimder qoldanylady. Turǵyn úıdiń sapaly bolatynyna senimdimin. Іske sát!», - dedi Janseıit Túımebaev.
Aıta keteıik, shahardaǵy «Otyrar» shaǵyn aýdanynan boı kóteretin nysandar «Nurly jer» memlekettik turǵyn úı baǵdarlamasyn iske asyrý jáne 7-20-25 baǵdarlamasy aıasynda ınvestıtsııalaý jobasy jumystarynyń nátıjesinde múmkin bolyp otyr. Atalǵan jumystardy «Túrkistan» áleýmettik - kásipkerlik korporatsııasy aktsıonerlik qoǵamy jáne Túrkistan oblysy men Túrkistan qalasy ákimdiginiń birlesip qolǵa alǵan.
