Túrkistanda kópfýnktsıonaldy zamanaýı jastar ortalyǵy ashyldy
Saltanatty ashylý rásimine oblys ákimi Janseıit Túımebaev pen QR Qoǵamdyq damý vıtse-mınıstri Juldyz Omarbekova, barlyq aýdan qala ákimderi, basqarma basshylary, respýblıkalyq qoǵamdyq uıymdardyń ókilderi men 200-den astam belsendi jastar qatysty.
Óńir basshysy Janseıit Túımebaev jınalǵandardy Jastar jylynyń bastalýymen jáne jańa ǵımarattyń ashylýymen quttyqtady.
«Men búgin sizdermen ákim retinde emes, zamandastaryńyz retinde erkin pikir almasqym keledi. Óıtkeni eń talantty, eń daryndy, eń otanshyl, eń eńbekqor jastar Túrkistan oblysynda turady dep esepteımin! Bıyl jastar úshin erekshe jyl bolǵaly tur. Elbasymyzdyń tikeleı tapsyrmasymen elimizde jastardy qoldaý baǵytyndaǵy jumystar kúsheıtiledi. Oblysymyzda da josparlar jasalyp, naqty jumystar bastalyp ketti. Osy kezdesýdiń aldynda men jańadan ashylǵan ǵımaratty aralap, tanysyp shyqtym. Munda jastardyń jan-jaqty damýyna, boıyndaǵy óneri men qabiletterin arttyrýyna tolyq jaǵdaı jasalǵan. Mysaly, kásipkerlikpen aınalysam deýshilerge Kovorkıng ortalyǵy, ІT-park, zańgerlik keńester qarastyrylǵan. Sonymen birge, eriktiler klýby, «Jas sarbaz», elektrondy kitaphana, tilder mektebi, ınternet jelisi, májilis zaly, sport alańshalary jáne taǵy basqa ıgilikter bar. Bul - Sizder úshin jasalǵan úlken qoldaý. Endi osy jastar ortalyǵynda órenderimiz ózderin damytyp, bilimderin shyńdaýy tıis», - dedi Janseıit Túımebaev.
Kópfýnktsıonaldy jańa úlgidegi Jastar ortalyǵy bir mezette 400-ge jýyq jasqa qyzmet kórsete alady. Ortalyqta «Jastarǵa qyzmet kórsetý» ortalyǵy, «Mobıldi top», Turkistan HUB coworking zone, IT PARK, Robototehnıka mektepteri, Kovorkıng alańy, elektrondy kitaphana, «Jas sarbaz», «Eriktiler mektebi», «Qurylys jasaqtary», «Tilder mektebi», túrli jastar uıymdary, medıa stýdııa jáne psıhologııalyq terapııa sekildi kóptegen jastar klýbtary, mektepter men úıirmeler jumys jasaıdy. Sondaı-aq, ǵımarat ishinde «relax zone» demalys aımaǵy, ǵımarattyń syrtqy bóliginde fýtbol, voleıbol, basketbol, tennıs oınaýǵa arnalǵan sporttyq alańshalar ornalasqan.
Aıta keteıik, búgingi tańda Túrkistan oblysynda jalpy halyqtyń 25,2 paıyzyn quraıtyn 501 369 jas bar. Onyń ishinde 86 416 jas qalalyq jerden bolsa, 414 953 jas aýylda turady. Sonymen qatar, aımaqtyń barlyq aýyl-qalalarynda jastarǵa qyzmet kórsetetin ákimdikke qarasty Jastar resýrstyq ortalyqtary men 4 respýblıkalyq jastar uıymdarynyń fılıaly jáne etnomádenı ortalyqtar janynda jastar qanattary jumys isteıdi.
