Túrkistanda kongo-qyrym bezgeginen qaıtys bolǵan adamnyń dárigerlerdiń jaýapsyzdyǵynan kóz jumǵany anyqtaldy
ASTANA. Qazannyń 29-y. QazAqparat /Aıdar Ospanalıev/ - Ońtústik Qazaqstan oblysynda kongo-qyrym bezgegimen aýyrǵan azamatty dárigerler qabyldamaı qoıǵan. Nátıjesinde, ol asqynǵan aýrýdan kóz jumdy. Bul oqıǵa jóninde búgin jýrnalıstermen bolǵan aptalyq brıfıngte Bas prokýratýranyń resmı ókili Nurdáýlet Súıindikov málim etti,
dep habarlaıdy QazAqparat.
Resmı ókildiń derekterine qaraǵanda, oqıǵa shildeniń 31-i kúni Túrkistan qalasynyń ortalyq aýrýhanasynda bolǵan. Ol shilde aıynyń 24-i men 30-y aralyǵynda qalanyń birneshe aýrýhanasyna baryp, densaýlyq jaǵdaıynyń múshkildigine shaǵymdanǵan. «Naýqastyń boıynda kongo-qyrym bezgeginiń alǵashqy belgileri bar bolǵanyna qaramastan, dárigerler ony tek 6 kúnnen keıin ǵana juqpaly aýrýlar bólimine jatqyzǵan. Sóıtip, dárigerlerdiń jaýapsyzdyǵy saldarynan naýqas aýrýhanada kóz jumdy», dedi Bas prokýratýranyń resmı ókili.
