Túrkistanda kompozıtor Bekjigit Serdáliniń shyǵarmashylyq keshi ótti
TÚRKІSTAN. QazAqparat – Túrkistan qalasynda belgili kompozıtor, ǵalym ári jýrnalıst Bekjigit Serdáliniń shyǵarmashylyq keshi ótti. «Ómirde de, ónerde de san qyrly» atty bul shara sazgerdiń 60 jas mereıtoıyna arnaldy, dep habarlaıdy QazAqparat tilshisi.
Kesh barysynda Bekjigit Serdáliniń «Tanymal ánniń tarıhy» kitabynyń tanystyrylymy bolyp, oǵan arnalǵan «Sarasóz» jýrnalynyń jańa nómiri taratyldy.
Bul sharaǵa «Nur Otan» partııasy Túrkistan oblystyq fılıaly tóraǵasynyń birinshi orynbasary Beısen Tájibaev pen oblystyq mádenıet basqarmasynyń basshysy Ázimhan Qoılybaev, QR Kompozıtorlar odaǵynyń oblys boıynsha tóraıymy Quralaı Sátmuhanbetova, oblystyq jýrnalıster odaǵynyń tóraǵasy Ǵalymjan Elshibaı jáne bir top áriptes-dostary men BAQ ókilderi qatysty. Shyǵarmashylyq keshke kelgen qonaqtar arnaıy quttyqtaý hattaryn tapsyryp, sazgerge syı-sııapattaryn tartý etti. Jyly lebiz sońy ári qaraı Túrkistan oblysy mádenıet basqarmasyna qarasty «Ońtústik- fılm» mekemesi ázirlegen «Ómirde de, ónerde de san qyrly» atty 45 mınýttyq týyndy kópshilik nazaryna usynyldy.
