Túrkistanda kógaldandyrý jumystary qarqyndy júrýde
TÚRKІSTAN. QazAqparat - Túrkistan qalasynda kezekti senbilik ótti. Oǵan oblys ákiminiń orynbasarlary, basqarma basshylary men qyzmetkerleri, aýdan-qala ákimdikteri men jergilikti turǵyndar belsene qatysty, dep habarlaıdy QazAqparat Túrkistan oblysy óńirlik kommýnıkatsııa qyzmetine silteme jasap.
Aýqymdy sharada oblys ákiminiń orynbasary Sáken Qalqamanov sektorlardaǵy jumystarmen tanysyp, aǵash otyrǵyzýǵa atsalysty.
Túrkistandy kórkeıtý men abattandyrý úshin qala 32 sektorǵa bólingeni belgili. Búgin atalǵan sektorlar 25 myń túp kóshet (shaǵan, sán aǵash, úıeńki, qaraórik, qaraǵash, tut, kashtan, arsha, lıpa) otyrǵyzdy.
Sektorlarǵa bekitilgen aýdan-qalalar tarapynan senbiliktegi kógaldandyrý, aǵash otyrǵyzý jumystaryna 2500-den astam adam men 245 tehnıka jumyldyryldy.
Sonymen qatar aýmaqtyq 23 departament mamandary qala ishindegi uzyndyǵy 8 shaqyrymdy quraıtyn R33, R-32 kanaldarynyń boıyna aǵash egý, tazalaý jumystaryn júrgizdi.
