Túrkistanda kógaldandyrý jumystary qarqyndy júrgizilýde
TÚRKІSTAN. QazAqparat – Túrkistan oblysynyń ákimi Ómirzaq Shókeev Túrkistan qalasynn abattandyrý jáne kógaldandyrý jumystarymen tanysty, dep habarlaıdy QazAqparat tilshisi.
Aımaq basshysy jaýapty mamandarǵa sanıtarlyq talaptardy saqtap, saqtyq sharalaryn qolǵa alý kerektigin eskertti.
«Koronavırýs ınfektsııasyna qatysty óńirdegi kórsetkishter qýantarlyq emes. Oblys aýmaǵynda karantın jáne shekteý is-sharalary koronavırýs indeti epıdemıologııalyq jaǵdaı turaqtalǵanǵa deıin saqtalatyn bolady. Osyǵan oraı, barlyq aýdan– qala ákimderi, basqarma basshylary men tıisti memlekettik organdar shekteý sharalaryna sáıkes jumys atqarýlary qajet. Túrkistan oblysynda karantın talaptary qatań saqtalýy tıis. Ásirese qurylys salasynda saqtyq sharalary men tártipti kúsheıtý kerek»,-dedi Ómirzaq Shókeev.
Aıta keteıik, qaladaǵy «Jelilik saıabaq» abattandyrýy aıaqtalýǵa jaqyn. Sýburqaq qurylysy men jalpy sýarý júıesi tolyq bitken. Qazirgi tańda syrtqy sýǵarý júıeleriniń qurylysy men aǵashtardy otyrǵyzý, gazon tóseý jumystary men aıaqjoldar, kerýen joldary jáne kanal jumystary aıaqtalýǵa jaqyn. Saıaly baqta basseınder salynyp, jaryq shamdar qoıylǵan. San alýan túrli gúlder men baǵaly aǵash túrleri otyrǵyzylǵan.
Al, «Áziret Sultan» qoryq-murajaıynyń aýmaǵyn abattandyrý boıynsha jumystary 4 kezeńge bólingen. Murajaı aýmaǵynda jer tegistelip, káriz júıesin júrgizý jumystary júrip jatyr. Sýburqaq alańyna beton quıý jumystary júrgizilýde. Qurylys alańynda 82 jumysshy jumyldyrylǵan. Tuńǵysh Prezıdent saıabaǵynda káriz jáne elektr júıeleri tolyqtaı aıaqtaldy. Jer tegistelip, jaryq júıesi júrgizilip, syrtqy sý súıesimen tolyq qamtamasyz etilgen. Saıabaq aýmaǵynda 2000-ǵa jýyq túr aǵash egilgen.
