Túrkistanda kıeli jerler boıynsha kópkúndik aqparattyq týr bastaldy
Oblys ákimdiginen málim etkendeı, jobanyń maqsaty – óńirdegi kıeli oryndar tizimine engen nysandardy tanystyrý, nasıhattaý, tanymaldyǵyn arttyrý, tarıhı sanany jańǵyrtý jáne ishki týrızmdi damytý. Alty kúndik aqparattyq týrdy Túrkistan oblysynyń qoǵamdyq damý basqarmasynyń tapsyrysy boıynsha «Open Kazakhstan» JShS uıymdastyryp otyr.
Atalǵan jobanyń 3 kúnge sozylatyn alǵashqy kezeńiniń ashylý saltanaty Kentaý qalasy aýmaǵyndaǵy Shámmet ıshan meshit-medresesinde ótti. Jıynda oblystyq Qoǵamdyq damý basqarmasy basshysynyń orynbasary Damır Júnisov «Rýhanı jańǵyrý» baǵdarlamasy aıasynda qolǵa alynǵan bul bastama rýhanı salaǵa silkinis berip, ishki týrızmniń damýyna da oń áser etetinin atap ótti. Mundaı jobalar aldaǵy ýaqytta da jalǵasatynyn, osy rette jýrnalıster men áleýmettik jeli belsendileri de ólketanýdy dáripteýge úles qosýlary kerektigin aıtty.
«Serpilis» qoǵamdyq birlestiginiń tóraıymy Beısenkúl Narymbetova óńirdiń tarıhı jáne kıeli oryndaryn dáripteý arqyly eldiń tarıhı sanasy qalyptasyp, rýhy myqty bolatynyn jetkizdi.
Odan keıin aqparattyq týrǵa qatysýshylar 13-inshi ǵasyrdan beri kóktep turǵan tut aǵashyna baryp, tarıhymen tanysty.
Alǵashqy kezeńde oblystyń BAQ ókilderi men áleýmettik jeli belsendileri 2-4 tamyz aralyǵynda oblystaǵy 15 qasıetti orynǵa saparlaıtyn bolady. Shámmet ıshan meshit-medresesi men myńjyldyq tut aǵashynan bastaý alatyn baspasóz týry Úkasha ata, Jylaǵan ata oryndary men Saýran qalashyǵy, Esim han kesenesi, Áziret Sultan kesheni, ıAssy (Kúltóbe, Túrkistan), Álqoja kesenesi, Gaýhar ana kesenesi, Arystan bab kesenesi, Otyrar qalashyǵy, Qajymuqan Muńaıtpasov mazary syndy qasıetti oryndardy aralaýmen jalǵasyp, Ordabasy aýdanyndaǵy «Birlik – Ordabasy» memorıaldy kesheninde túıindeledi. Jýrnalıster men jeli belsendileri ashyq aspan astynda arnaıy palatkalarda túneıdi.
Al jalpy osy baspasóz týry aıasynda qatysýshylar óńirdegi 40 kıeli orynǵa saıahat jasap, jurtshylyqqa nasıhattaıdy.
Túrkistan oblysynan 20-dan astam nysan respýblıkalyq mańyzy bar qasıetti, kıeli jerler tizimine engizilse, 60-tan astam tarıhı-mádenı eskertkish oblystyq mańyzy bar kıeli oryndar tizimine kirgen bolatyn. Osy nysandarǵa kelýshiler úshin qolaıly jaǵdaılar jasalyp, Qoja Ahmet ıAsaýı kesenesi aýmaǵyn jáne Kúltóbe qalashyǵyn qalpyna keltirý jumystary bastaldy. Úkasha ata kesenesine baratyn avtokólik jolyn salý, avtoturaq jáne oryndyqtarmen qamtý, Appaq Ishan meshitiniń shatyryn retke keltirý jumystary da qolǵa alynǵan.
