Túrkistanda keıýana júz jasqa qaraǵan shaǵynda Qazaqstan azamattyǵyn aldy
TÚRKІSTAN. QazAqparat - Túrkistan QPB-nyń Kóshi-qon qyzmeti bólimine 1922 jyly týǵan Amankúl Marasýlova QR azamattyǵyna qabyldaý týraly ótinish bildirgen, dep habarlaıdy QazAqparat ІІD baspasóz qyzmetine silteme jasap.
Keıýana ulty qazaq bolǵanymen, Ózbekstan Respýblıkasynyń azamattyǵyn alǵan. 2011 jyly Qazaqstandaǵy ulynyń úıine kelip, turǵylyqty turý úshin is-
qujattaryn ótkizip, QR-nyń yhtııar hatymen qujattandyrylǵan. Bul qujattyń
aıaqtalý merzimi jaqyndap qalǵan soń ári perzentteri Qazaqstanda turatyndyqtan QR
azamattyǵyna ótkisi kelgen. Sodan tártip saqshylary birden áreket etip, aq jaýlyqty anany HQKO-na jedel jetkizip, qajetti foto-beınege túsiredi. Іs- qujattaryn tez arada jınaqtaıdy. Osylaısha Túrkistan qalasynyń turǵyny Amankúl Marasýlovaǵa azamattyq alýǵa kómek berildi.
Daıyn qujatty tabystaý úshin Túrkistandyq polıtseıler ǵasyrǵa jýyq ómir súrgen ananyń qara shańyraǵyna arnaıy bardy. Qart kisini kele jatqan Jańa jyl merekesimen quttyqtap, syı-syıapattaryn jasady.
Óz kezeginde keıýananyń kýanyshynda shek bolmady. Ol polıtsııa qyzmetkerlerine
analyq alǵysyn jaýdyrdy. «Bizder kezinde qanshama qıynshylyqtardy kórgenbiz. Endigi ýaqytta biz kórgen soǵysty, asharshylyqty kórmeńder. Denderińe saýlyq tileımin. Elimiz aman bolsyn, kóbeıip, ósip-óne berińder»,-dep shynaıy rızashylyǵyn bildirip, aq batasyn berdi.
Al, ájeıdiń uly Abdýrahım Marasýlov bolsa, anasy kezinde sharýaqor adam bolǵanyn jetkizdi. «Ákemizden jastaı aıyryldyq. Sonda da anamyz bizdi eshkimnen
kem qylmaı ósirdi. Oqytty. Ómirge 3 ul 1 qyzdy ákeldi. Olardan 5 nemere, 13 shóbere súıip
otyrǵan jaıy bar. Otbasymyzda barlyǵymyz Qazaqstan Respýblıkasynyń azamattyǵyn alǵanbyz. Endi mine anamyzda bizdiń qatarymyzǵa qosyldy. Qýanyshtymyz!»-dep atap ótti ol.
Jalpy, Qazaqstan Respýblıkasy ІІM-niń tapsyrmasyna sáıkes Túrkistan oblysy Polıtsııa departamentinde qujattanbaǵan nemese KSRO qujatymen qalyp qoıǵandarǵa, egde jastaǵy júrip-turýy qıyn qarııalarǵa qujat rásimdeý maqsatynda kóshi-qon qyzmetkerlerinen arnaıy mobıldik toptar qurylǵan.
