Túrkistanda kedergilerge tap bolǵan kásipkerler máselesi ońaı sheshilmek
TÚRKІSTAN. QazAqparat - Túrkistan oblysynyń ákimdigi QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń oblys boıynsha departamentimen birlesip «Adal kásip - adal násip» atty kásipkerlerge arnalǵan Ashyq esik kúnin ótkizdi, dep habarlaıdy QazAqparat.
Jıynǵa oblys ákiminiń orynbasary Erbol Tasjúrekov, Memlekettik qyzmet isteri jáne sybaılas jemqorlyqqa qarsy is-qımyl Agenttiginiń oblystyq Departamentiniń basshysy Ǵalym Tursynbaev, Oblystyq «Atameken» ulttyq kásipkerler palatasynyń dırektory Oljas Qarjaýov, Oblystyq Memlekettik kirister departamentiniń basshysynyń orynbasary Erkin Elshibekov, sondaı-aq nesıemen qarjylandyrý mekemeleriniń basshylary qatysty. Onda ákimdik pen salaǵa jaýapty mekeme qyzmetkerleri kópshiliktiń kókeıinde júrgen saýaldaryna jaýap berip, ótinishteri men shaǵymdaryn tyńdady.
Kezdesýde kóterilgen máselelerdiń deni agro-ónerkásiptik salasyndaǵy jobalardy júzege asyrý úshin bólinetin jer men qajetti qurylǵylar, jańa kásip ashý nemese óndiristi keńeıtý maqsatynda beriletin nesıelerdiń mólsherine, qaǵazbastylyq pen kásipkerlerge keltiriletin túrli kedergilerge baılanysty boldy. Oblys ákiminiń orynbasary bıznes ókilderine qatysty barlyq máseleler tirkeýge alynyp, oń sheshimin tabýǵa barynsha yqpal etetinin jetkizdi.
«Búgingi sharaǵa Túrkistan qalasynan bólek, basqa da aýdan, qalalardan arnaıy kelgen jas kásipkerlerdiń kóp bolýy meni qýantty. Budan bylaı mundaı kezdesýler óńirimizdiń barlyq aýdandary men qalalarynda «Kásipker kúni» degen atpen ár aıdyń 20-shy juldyzynda dástúrli túrde ótkiziletin bolady. Onda árbir kásipker osy salaǵa qatysty mekemeler tarapynan jasalǵan kez-kelgen ákimshilik kedergiler men shekteýler týraly habarlaı alady. Biz bıznestiń damýyna qıyndyq týǵyzyp jatqan barlyq faktilerdi qarastyratyn bolamyz», - dedi Erbol Tasjúrekov.
Óz kezeginde, «Ońtústik» ÓIO, «Yrys» nesıelik mekemeleriniń ókilderi kásipkerlerdi qoldaýǵa baǵyttalǵan baǵdarlamalardy tanystyryp, byltyr atqarylǵan jumystarynyń nátıjeleri týraly aıtyp ótti. 2018 jyly 6 mlrd. teńgege 1292 joba qarjylandyrylǵan. Onyń ishinde 49 jobasy «Ońtústik» ÓIO-nan kómek alsa, 1243-ine «Yrys» qarjy bólgen. Nátıjesinde 1403 jańa jumys orny paıda boldy.
Odan bólek, Kásipkerler palatasy da osyǵan uqsas halyqqa qyzmet kórsetip keledi. Máselen, ótken jyly 4654 kásipker qarjylaı emes kómek alǵan. 1379 joba 3,6 mlrd. teńgege qarjylandyrylǵan. Sondaı-aq, atalmysh mekeme oblystyń ár aýdanyn saralap, jalpy quny 530 mlrd. teńgeni quraıtyn 36 ınvestıtsııalyq jobany aıqyndaǵan. Aldaǵy ýaqytta sol jobalardy iske asyryp, súıemeldeý jumystary júrgiziletin bolady.
Aıta keteıik, «Adal kásip - adal násip» baǵdarlamasy aıasynda WhatsApp jelisinde onlaın-qyzmet engizildi. Eger de kásipkerlik salasyna qatysty qandaı da bir saýalyńyz bolsa, +7 778 555 60 30 nómirine, shaǵymdar men usynystardy tez arada joldaı alasyz. Kelip túsken hattar ákimdik tarapynan baqylaýǵa alynyp, kásipkerlerdiń jumysyn jaqsartý úshin tıisti sharalar qoldanylady.
