Túrkistanda Qajymuqan Muńaıtpasulynyń júldesine arnalǵan halyqaralyq týrnır bastaldy
Túrkistanda qazaq kúresinen eresekter arasynda Qajymuqan Muńaıtpasovtyń júldesine arnalǵan Halyqaralyq týrnıri ótýde. Dástúrli jarysta Tájikstan, Ózbekstan, Qyrǵyzstan, Qytaı memleketteri men elimizdiń barlyq óńirlerinen kelgen 300-ge jýyq sportshy baq synap jatyr.
Azııa kýbogynda saıdyń tasyndaı iriktelegen bilekti de júrekti balýandarǵa Túrkistan oblysy ákiminiń orynbasary Arman Sabıtov sáttilik tiledi.
«Qazaq kúresi – ulttyq sport túrleriniń ishinde ózindik orny bar erekshe sporttyń túri. Qazirgi ýaqytta álemniń 40-tan asa elinde ulttyq kúresimizden federatsııalar qurylyp, jumys atqarýda. Qazaq kúresinen Álem, Azııa, Afrıka jáne Eýropa chempıonattary ótkizilip, damýdyń jańa deńgeıine kóterildi. Keıingi on jyl kóleminde ótip jatqan «Qazaqstan barysy», «Eýrazııa barysy» jáne «Álem barysy» dodalary da búginde kórermen kózaıymyna aınalyp otyr. Biz ulttyq sportymyzǵa qoldaý kórsetýge árqashan daıynbyz!» – delingen quttyqtaý hatynda.
2 kún boıy jalǵasatyn balýandar beldesýinde 55, 60, 66, 74, 82, 90, 100, +100 keli salmaq dárejesindegi úzdikter anyqtalatyn bolady. Jarystyń bas tóreshisi Erlan Imanǵalıevtiń aıtýynsha, jeńimpazdarǵa qarjylaı syı-sıpat usynylyp, túıe balýanǵa avtokóliktiń kilti tabystalmaq.
Aıta keteıik, jýyrda Túrkistan qalasynda qazaq kúresinen «Turan barysy» Azııa kýbogy uıymdastyrylyp, jarys nátıjesinde Qazaqstan qurama komandasy jeńimpaz atanǵan bolatyn.
