Túrkistanda Qajymuqan Muńaıtpasovtyń 149 jyldyǵyna oraı týrnır ótedi
TÚRKІSTAN. QazAqparat - Túrkistanda Qajymuqan Muńaıtpasovtyń 149 jyldyǵyna oraı týrnır ótedi. Kúsh atasynyń dástúrli halyqaralyq týrnıri bıyl 17 mamyr kúni bastalyp, 3 kúnge sozylady dep josparlanǵan. Bul týraly Óńirlik kommýnıkatsııalar qyzmetinde Ordabasy aýdanynyń ákimi Qaırat Joldybaıuly men oblystyq sport basqarmasynyń basshysy Polat Qyryqbaev málim etti, dep habarlaıdy QazAqparat tilshisi.
Qajymuqan Muńaıtpasovtyń 149 jyldyǵyna arnalǵan 55-shi týrnırge 5 memleketten 200-den astam sportshy qatysady dep josparlanýda. Bıylǵy doda eń myqtyny anyqtaýmen qatar, qazaq kúresiniń damý satysyndaǵy taǵy bir baspaldaqqa kóterilýiniń kórinisine aınalmaq. Uıymdastyrýshylardyń aıtýynsha, dástúrli týrnır qazaq halqynyń tarıhyndaǵy tuńǵysh kásipqoı balýan, orasan kúshtiń ıesi, kúrestiń birneshe túrinen álem chempıony Qajymuqan Muńaıtpasulyn urpaq jadynda jańǵyrtyp otyrýǵa baǵyttalǵan. Ol - 54 memlekette kúreske túsip, 48 medal oljalaǵan jaýyryny jerge tımegen batyr.
«QR Tuńǵysh Prezıdenti Nursultan Nazarbaev Máńgilik el bolý muraty babalardyń erligi, búgingi býynnyń eren isteri jáne jas urpaqtyń jasampazdyǵy arasynda sabaqtastyq bolsa ǵana júzege asatynyn únemi aıtyp keledi. Tarıhta esimi altyn áriptermen jazylǵan Qajymuqan Muńaıtpasovtyń erligi, eldiń atyn álemge tanytýǵa sińirgen eńbegi ushan teńiz. Ómiriniń sońǵy kúnderin Ordabasyda ótkizip, osy qasıetti mekendi máńgilik turaǵy etken palýannyń izin búginde álemdik, halyqaralyq jarystarda top jaryp júrgen balýandar: Ulas Momynov, Nurlan Asylov, Dáýlet Baıjigitov, Qýat Baıqojaev, Eltaı Sydyqov, Ońǵar Úndemesov, Ońdybaı Úndemesov, Seıdahmet Qonaqbaev syndy jigitter basyp keledi», - dedi Ordabasy aýdanynyń ákimi.
Búginde atalǵan aýdannan shyqqan Jumanazar Ersultanov, Ádiljan Ystybaev, aǵaıyndy Ǵumar, Ǵusman Qyrǵyzbaevtar, Abzal Arystanbek talaı dúbirli dodadan top jaryp, Ordabasy óńiriniń mereıin tasytyp júr. Sondaı-aq, Ordabasy jerinen QR eńbegi sińgen 6 jattyqtyrýshy, 3 sport qaıratkeri, kúresten 100-den asa sport sheberi, birneshe halyqaralyq dárejedegi sport sheberi, Álem birinshilikteriniń, Azııa chempıonattarynyń jeńimpazdary men júldegerleri shyqqan.
