Túrkistanda Qazaqstan men Ózbekstannyń óńiraralyq yntymaqtastyǵynyń ІІІ forýmy ótýde

TÚRKІSTAN. QazAqparat – Túrkistanda úkimet basshylarynyń qatysýymen «Transshekaralyq yntymaqtastyq ósýdiń jańa núkteleri retinde» taqyrybynda Qazaqstan men Ózbekstannyń óńiraralyq yntymaqtastyǵynyń III forýmy bastaldy. Erteń eki eldiń premer-mınıstrleri saýda-ekonomıkalyq yntymaqtastyqty damytýdyń ózekti máselelerin talqylaıdy dep kútilýde, dep habarlaıdy QazAqparat QR saýda jáne ıntegratsııa mınıstrliginiń baspasóz qyzmetine silteme jasap.

Búgin Forýmnyń birinshi kúni aıasynda eki eldiń bıznes-qoǵamdastyǵy ókilderiniń kezdesýleri ótýde. Qazirdiń ózinde 40 V2V astam kezdesýler ótkizildi.

Kelissózder qorytyndysy boıynsha jalpy somasy 200 mıllıon AQSh dollarynan asatyn kelisimsharttar jasalady dep kútilýde.

Qazaqstan men Ózbekstan arasyndaǵy taýar aınalymy 2021 jyldyń 9 aıynda 2 886,9 mln AQSh dollaryn qurady, bul 2020 jyldyń uqsas deńgeıinen 28,5% - ǵa joǵary. Onyń ishinde 2 098,2 mln AQSh dollary – Qazaqstannan taýarlar eksporty (ósim 30,1%).

Ózbekstanǵa qazaqstandyq eksporttyń negizgi taýarlary: qospalanbaǵan bolattan jasalǵan jartylaı fabrıkattar, qospalanbaǵan bolattan jasalǵan jazyq ılek, jeńil avtomobılder, mys kontsentrattary, AÓK ónimderi (bıdaı, un, soıa maıy jáne t.b.) bolyp tabylady.

Ózbekstannan keletin ımporttyń negizgi taýarlary jańa pisken jemister men jıdekter, edenge arnalǵan kirpish jáne qurylys bloktary, keramıkadan jasalǵan buıymdar, etılen polımerleri bolyp tabylady.

Esterińizge sala keteıik, 2021 jylǵy 22 qarashada Ózbekstan Respýblıkasynyń Prezıdenti Sh.M. Mırzıeevtiń Qazaqstan Respýblıkasyna memlekettik saparyna daıyndyq sheńberinde Saýda jáne ıntegratsııa mınıstri - QR Prezıdentiniń Ózbekstan boıynsha arnaıy ókili B.T. Sultanovtyń Ózbekstan Respýblıkasyna jumys sapary ótti.

Ózbekstan Respýblıkasynyń Premer-Mınıstri Abdýlla Arıpovpen, sondaı-aq Ózbekstan Respýblıkasy Premer-Mınıstriniń orynbasary - QR Investıtsııalar jáne syrtqy saýda mınıstri Sardor Ómirzaqovpen, Ózbekstan Respýblıkasynyń Kólik mınıstri Ilhom Mahkamovpen jáne QR Aýyl sharýashylyǵy mınıstri Jámshıd Hodjaevpen kezdesýde ekijaqty saýda-ekonomıkalyq qatynastardyń negizgi máseleleri talqylandy.

Qatysýshylar ózara saýda kólemin $10 mlrd-qa deıin ulǵaıtýdy birlesken jumys úshin birinshi kezektegi mindetterdiń biri dep belgiledi.

Taraptar «Ortalyq Azııa» halyqaralyq saýda-ekonomıkalyq yntymaqtastyq ortalyǵy (HSEYO) jobasyn iske asyrý barysyn talqylady. Budan basqa, osy ortalyqtyń ónerkásiptik baǵyty týraly ýaǵdalastyqqa qol jetkizildi, bul eki eldiń ónerkásiptik kooperatsııasyn damytýǵa múmkindik beredi. HSEYO barynsha ekonomıkalyq áserge qol jetkizý úshin jáne soltústik-ońtústik, batys Eýropa – Batys Qytaı kólik dálizderimen ıntegratsııalaý maqsatynda Qazaqstan tarapy HSEYO-ny Qazaqstan Respýblıkasynyń aýmaǵynda «Alataý» SO jáne «Qorǵas» ShYHO-men, sondaı-aq ózbek-aýǵan shekarasynda «Termez» HSO-men jáne Ózbekstan shekarasynda josparlanyp otyrǵan uqsas shekara mańyndaǵy ortalyqtardy Qyrǵyzstanmen jáne Túrikmenstanmen ushtastyrýdy qamtamasyz etýdi usyndy.

QR Saýda jáne ıntegratsııa mınıstriniń - QR Prezıdentiniń Ózbekstan boıynsha arnaıy ókiliniń kezdesýleri kezinde HSEYO jobasyn iske asyrý qazaqstandyq jáne ózbek taýarlaryn úshinshi elderdiń iri naryqtaryna birlesip jetkizý úshin Eýrazııalyq taýar ótkizý jelisin qurý jónindegi bastamany ilgeriletý, sondaı-aq maýsymaralyq kezeńde óz naryqtaryn molyqtyrý sheńberinde erekshe ózekti ekeni aıtyldy.

Kezdesýler barysynda taraptar ózara saýdadaǵy kedergilerdi joıýdy, sondaı-aq, Qazaqstan men Ózbekstannyń kólik salasyndaǵy, sonyń ishinde temirjol kóligi salasyndaǵy yntymaqtastyǵy talqylandy.

Buryn habarlanǵandaı, Ózbekstan Respýblıkasynyń Prezıdenti Sh.M. Mırzıeevtiń Qazaqstan Respýblıkasyna memlekettik sapary 2021 jyldyń sońyna deıin kútilýde.