Túrkistanda qazaq handary tusyndaǵy teńgeler kórmesi ashyldy
Qoja Ahmet ıAsaýı kesenesinde uıymdastyrylǵan kórmege Otyrar qoryq-mýzeıi men Názir Tórequlov mýzeıi tarıhı-mádenı etnografııalyq ortalyǵynyń qyzmetkerleri, qalalyq ardagerler keńesi men qazaq tili qoǵamynyń músheleri, sondaı-aq mektep oqýshylary men ustazdar, qala turǵyndary men qonaqtary qatysty, dep habarlaıdy QazAqparat tilshisi.
«Áziret Sultan» memlekettik tarıhı-mádenı qoryq-mýzeıiniń bastamasymen ótken shara Elbasy Nursultan Nazarbaevtyń «Bolashaqqa baǵdar: rýhanı jańǵyrý» maqalasy aıasynda uıymdastyryldy.
«Táýelsizdik nyshany - tól teńge» kórmesi qazaq jerinde soǵylyp, aınalymda júrgen aqsha túrleri jəne 1993 jyly aınalymǵa jiberilgen teńge banknottary men monetalardyń úlgileri, teńgeniń evolıýtsııalyq damý barysyndaǵy úlgileri men Qazaqstan Ulttyq bankiniń kollektsııalyq teńgeleri syndy bes bólimnen turady.
San ǵasyrlyq tarıhı kezeńderdi qamtıtyn kórmede qazaq jerinde meken etken túrki memleketteriniń aqsha túrleri tanystyryldy. Táýelsizdigimizdiń jarshysy bolǵan teńgelerdiń 1993 jylǵy alǵashqylarynan bastap, búgingi tańǵa deıingi damý tarıhynan habar beretin úlgileri kópshilik nazaryna usynyldy. Máselen, qazirgi tańda álemdegi jalǵyz úlgisi ǵana belgili bolyp otyrǵan Shyńǵys han atymen Samarqanda soǵylǵan altyn dınar jəne búgingi tańǵa deıin belgisiz bolyp kelgen tyń jańalyq - Jáńgir han tusynda soǵylǵan mys aqsha da jurtshylyq nazaryna usynyldy. Ǵalymdar mýzeı qorynda saqtalǵan, Samarqand aqsha saraıynda jasalǵan dınar qazirgi kúnde tıpologııalyq turǵyda álemdegi jalǵyz aqsha dep otyr. Nýmızmatıka tarıhynda qazaq handary arasynda óz atynan aqsha soqtyrǵan tek Tursyn Muhammed hannyń teńgeleri ǵana belgili bolyp kelgen bolsa, Salqam Jáńgir hanǵa arnap jasalǵan teńgeniń tabylýy da aıtarlyqtaı jańalyqqa ıe. Qazaq nýmızmatıkasynyń tarıhyna jańasha kózqaraspen qaraýǵa múmkindik beretin bul tıyn úlgisi óte sırek kezdesetin aqshalar qatarynan oryn alady.
Aıta keteıik, «Áziret Sultan» qoryq-mýzeıiniń nýmızmatıkalyq qorynda búgingi tańda 13 myńnan asa jádiger saqtaýly. 
