Túrkistanda qaza tapqan bes adam Jańaqorǵan aýdanyna jerlendi
TÚRKІSTAN. QazAqparat - Túrkistan qalasynda oryn alǵan qaıǵyly jaǵdaıdyń sebebin anyqtaý úshin quzyrly organdardan qurylǵan top bolǵan jaıtty jan-jaqty tekserip jatyr. Oryn alǵan oqıǵanyń mán-jaıyn anyqtaýmen aınalysatyn arnaıy komıssııa shuǵyl brıfıng ótkizip, alǵashqy málimettermen bólisti, dep habarlaıdy QazAqparat tilshisi.
Jergilikti bılik ókilderi qaıǵy jamylǵan januıaǵa jan-jaqty kómek kórsetilip, demeýshiler tarapynan 7 mln teńge kóleminde materıaldyq kómek berilietindigin jetkizdi. Belgili bolǵandaı, oblystyq memlekettik qyzmetshiler kómek retinde bir kúndik jalaqylaryn aýdarýǵa nıet bildirgen.
«Oryn alǵan qaıǵyly jaǵdaı boıynsha qylmystyq is ashylyp, aldyn ala tergeý jumystary júrgizilýde. Tergeý nátıjesinde, jaýapty tulǵalardyń kinási anyqtalatyn bolsa, zań aıasynda jaýapkershilikke tartylady. Qyzylorda oblysy Jańaqorǵan aýdanynda Túrkistan qalasynyń ákimi Rashıd Aıýpov jáne basqa da qala ókilderi jerleý rásimine qatysty. Jerleýge baılanysty jáne basqa da materıaldyq shyǵyndar tolyqtaı óteletin bolady. Túrkistan oblysy ákimdigi tarapynan qaıǵyly jaǵdaıǵa ushyraǵan otbasyǵa qarjylaı kómek kórsetiledi», – dedi oblys ákiminiń birinshi orynbasary Arman Jetpisbaı.
Oqıǵa ornyna tótenshe jaǵdaı, polıtsııa, gazǵa jaýapty qyzmetkerlerimen tekserý júrgizilgen. Tekserý barysynda úıdiń 3 bólmeden turatyny, onda kamın túrindegi pesh (Iran peshi) ornatylǵany anyqtalǵan.
«Peshti muqııat tekserý barysynda ornatylǵan peshke gofrlengen burǵysh qosylǵany anyqtaldy. Ol 1,5 metr qashyqtyqta qabyrǵadaǵy tesik arqyly kóshege shyǵarylǵan. Syrtqy jaǵynan gofrlengen rozetka 5-7 sm ǵana quraıdy, osylaısha qatty jeldiń áserinen peshtegi tartylystyń nasharlaýyna yqpal etip ýly gaz bólme ishine taraýyna ákep soǵýy múmkin», – dedi oblystyq TJD basshysy Nurǵalı Júnisov.
