Túrkistanda qaıyrymdylyq dúken ashyldy

TÚRKІSTAN. QazAqparat - Túrkistan qalasynda búginnen bastap áleýmettik jaǵdaıy tómen otbasylar úshin qaıyrymdylyq dúken jumys isteı bastady, dep habarlaıdy QazAqparat.

Túrkistan qalasy ákiminiń baspasóz qyzmetinen málim etkendeı, ashylý saltanaty 9 Mamyr merekesine oraı ótken dúken oblystyq aqsaqaldar alqasy men «Qoǵamdyq kelisim» keńesiniń bastamasymen qolǵa alynǵan.

Sharaǵa qala ákimi Álipbek Óserbaev, kásipkerler men BAQ ókilderi qatysty.

Saýaby mol istiń turǵyndar ıgiligi úshin qajettiligi orasan ekenin aıtqan qala basshysy, oǵan óz tarapynan qoldaý bildirýge daıyn ekenin jetkizdi.

«Dúken aptanyń tek sársenbi kúni jumys isteıdi. Munda qalanyń 8 móltek aýdanynyń kóshe komıtetiniń tóraǵalary jasaǵan tizimder boıynsha muqtaj otbasylarǵa azyq-túlik, kıim-keshek qajetiligine qaraı beriletin bolady. Naqtyraq aıtqanda, ár aptada 40-50 adamǵa kómek kórsetilmek. Ol tizimge kópbalaly jáne turmysy tómen otbasylar engiziledi», - dedi oblystyq aqsaqaldar alqasynyń tóraǵasy J.Áziretbergenov.

Qazirgi tańda dúkende 2 tonna azyq-túlik, 4 myń dana kıim bar. Negizinen dúkenniń qory qaladaǵy demeýshilerdiń esebinen tolyqtyrylady. Dúken ál-Farabı kóshesi, №26 úı mekenjaıynda ornalasqan.