Túrkistanda «Qaýipsiz aýla» jáne «Aqyldy aıaldama» jobalary júzege asady
Bul týraly Óńirlik kommýnıkatsııalar qyzmetinde ótken baspasóz jıynynda oblystyq Aqparattandyrý, memlekettik qyzmetter kórsetý jáne arhıvter basqarmasynyń basshysy Bastar Esqaraev málimdedi, dep habarlaıdy QazAqparat tilshisi.
Basqarma basshysynyń sózinshe, óńirde «Energetıka jáne turǵyn úı-kommýnaldyq sharýashylyq salasy boıynsha «SmartCity» tujyrymdamasy iske asyrylýda. Atap aıtqanda, Túrkistan qalasyndaǵy Otyrar móltek aýdanynda 10 kópqabatty turǵyn úıge «E-SHANYRAQ» júıesine tolyqtaı ıntegratsııalaý jumystary jasalynǵan.
«Bul, ımpýlsti qashyqtyqtan basqarylatyn eseptegishter arqyly sýdy, jylýdy jáne elektr energııasy kózderiniń berilýin baqylaý bolyp tabylady. Osy arqyly shyǵyndardy bekitý, qarjatty jumsaý qyzmetiniń ashyqtyǵy qamtamasyz etiledi. Turǵyndar ınternet arqyly esepteýler men esep aıyrysýlardyń durystyǵyn teksere alady, úı boıynsha shyǵyndar men tabystardy baqylaı alady. TKSh máseleleri boıynsha onlaın túrde ótinishter qabyldanady. Odan bólek, qaladaǵy turǵyn úılerge 8 dana beınebaqylaý kameralary ornatyldy jáne pılottyq joba retinde jol erejelerin baqylaý úshin 6-beınekameramen qamtamasyz etildi», - dedi Bastar Esqaraev.
Basqarma basshysy sonymen qatar, «SmartCity» baǵdarlamasy negizinde bıyl pılottyq joba retinde Túrkistan qalasyndaǵy saıabaqtar men kóshelerge «Aqyldy jaryqtandyrý» jobasyn engizý jumystary qolǵa alynǵanyn atap ótti.
«Bul jaryq berý aımaǵynda ózdiginen avtomatty túrde jaryq sóndiriledi nemese azaıady, sondaı-aq avtokólikter jaryqtandyrý aımaǵyn kesip ótken kezde ǵana avtomatty túrde qaıta qosylýyna múmkindik beredi. Qazirgi tańda, oblys boıynsha 700 kóshe kún panelderi júıesinde fotorele datchıkteri bar jaryq shamdary ornatylǵan. Oblys boıynsha mehanıkalyq taımer júıesi boıynsha 1294 aqyldy jaryq shamdary ornatyldy»,- dedi Bastar Esqaraev.
Sonymen qatar oblystaǵy 902 mekteptiń 775-i nemese 86,1 paıyzy ınternet jelisine qosylǵan. 735 bilim uıasynda, ıaǵnı 81,4 paıyzynda WI-FI núktelerimen qamtamasyz etilgen. Jyl sońyna deıin shalǵaı aýyldardaǵy 127 mektepti keńjolaqty ınternetpen jáne 167 mektepti WI-FI núktelerimen tolyq qamtý osy jyldyń jumys josparyna engizildi. Tsıfrlandyrý júıesi ásirese memlekettik qyzmet kórsetý salasynda keń qoldanysta. Máselen, ótken jyly 10,955 myń memlekettik qyzmet kórsetilgen. Onyń 9,350 myńy elektrondyq túrde, qaǵan 1 372 myńy qaǵaz túrinde iske asyrylǵan.