Túrkistanda kásipkerlik nysandary kezek-kezeńimen lokdaýnnan shyǵarylady

Osy protsesti júzege asyrý úshin arnaıy «InfoKazakhstan» elektrondy platformasy iske qosyldy. Bul týraly búgin Óńirlik kommýnıkatsııalar qyzmetinde ótken brıfıngte Túrkistan oblysy kásipkerler palatasynyń dırektory Tımýr Naqypbekov málimdedi.

Onyń sózinshe, bul joba epıdemıologııalyq qaterlerdi azaıtýǵa, sondaı-aq kásipkerlik qyzmetti jańartý úshin qolaıly jaǵdaı týǵyzatyn qural bolady.

«InfoKazakhstan elektrondy platformasy kásipkerlerdiń yńǵaıyna qaraı jáne adamı faktordyń áserinsiz bıznestiń lokdaýnnan shyǵýynyń ashyqtyǵyn qamtamasyz ete otyryp iske qosyldy. Atalǵan platforma arqyly ár kásipker qyzmetin qaıtadan iske qosý úshin ótinish bere alady», - dedi Túrkistan oblysy kásipkerler palatasynyń dırektory Tımýr Naqypbekov.

Platformanyń qarapaıym ınterfeısi qysqa merzimde 4 qadam arqyly kásipkerlik nysannyń sanıtarlyq normalarǵa sáıkestik aktisin alýǵa múmkindik beredi. Birinshi qadamda kez-kelgen azamat «InfoKazakhstan» saıtyna kirip, uıymdy elektrondy tsıfrlyq qoltańba arqyly tirkep, kásipkerligine qoıylǵan talaptarmen tanysa alady. Al, bıznestiń jekelegen túrleri jumysyn tekserýsiz, habarlama tártibinde qaıta bastaı alady. Ekinshiden, kásipkerlik nysandy talaptarǵa saı daıyndap, elektrondy ótinim berip, jumys bastaıtynyn rastaıdy. Úshinshiden, kásipker sanıtarlyq-epıdemıologııalyq qyzmettiń tekserý júrgizýin kútedi. Tórtinshi qadam boıynsha tekserý júrgizilgen soń nátıje oń bolsa, onda jeke kabınette jumysty qaıta bastaýǵa sanıtarlyq normalarǵa sáıkestik aktisin júktep alý qajet. Eger nátıjesi teris bolsa, onda olqylyqtardy rettep, ótinim qaıta jiberiledi.

Bul rette kásipkerler bıznestiń jumys isteýge daıyndyǵy týraly ótinishti júktep, sanıtarlyq normalar men talaptardy saqtaıtynyna kepildik beredi. Talaptar oryndalmaıtyn bolsa aıyppuldyq sanktsııalar qoldanylady. Saıtta qoǵamdyq baqylaý fýnktsııasy da jumys isteıdi. Kez kelgen azamat kásiporyn tarapynan sanıtarlyq normalardyń buzylǵany jaıynda shaǵym túsire alady. Al jeke kabınet arqyly kásipker ótinishtiń qaralý deńgeıin baqylap, elektrony ótinish, azamattardan kelip túsken usynymdar men shaǵymdardy qaraı alady.

Sondaı-aq, saıtta ákimdikter, sanıtarııa dárigerleri, polıtsııa, óńirlik palatalar jáne tutynýshylar lıgasy ókilderinen quralǵan turaqty monıtorıngtik top jumys isteıdi. Resýrs qyzmetin bir mezgilde 150 000 tutynýshy paıdalana alady.

Túrkistan oblysy Kásipkerler palatasy janyndaǵy kásipkerlerge qyzmet kórsetý ortalyǵy jáne aýdandyq fılıal qyzmetkerleri kásipkerlerge ETsQ alýda jáne jańartýda kómekter berip, súıemeldeýge daıyn.

Barlyq suraqtardy biryńǵaı baılanys-ortalyǵyna 1432, 109 (qońyraý shalý tegin) qońyraý shalyp, qoıýǵa bolady.

Aıta keteıik, jalpy karantın Túrkistan oblysynda qyzmet kórsetý jáne saýda salasyndaǵy 39 myńnan astam kásipkerdiń qyzmetine teris áser etti. Atalǵan salada 76 myńǵa jýyq adam jumys isteıdi. Jedel shtabtyń 3 myń kásipkerge júrgizgen saýalnama nátıjesi qatysýshylardyń 45%-y jumyskerlerin qysqartqan nemese aqysyz demalysqa jiberýge májbúr bolǵanyn kórsetken. Mamandar osy máseleni kezeń-kezeńimen ońtaıly sheshilýine zor yqpal etetinin aıtady.