Túrkistanda kásipkerler palatasy, sot jáne prokýratýra úshjaqty memorandým túzdi
TÚRKІSTAN. QazAqparat - Túrkistan oblystyq Kásipkerler palatasy bıznesti qoldaý boıynsha sot jáne prokýratýramen úshjaqty memorandým túzdi. Endigi jerde óńirlik palata oblystyq sot jáne prokýratýramen yntymaqtastyqty kúsheıtedi, dep habarlaıdy QazAqparat tilshisi.
Bul kelisimge Memlekettik qyzmet isteri jáne sybaılas jemqorlyqqa qarsy is-qımyl agenttiginiń oblystaǵy departamenti de yntymaqtastyq tanytty. Palata ókilderiniń sózinshe, bul qujat kásipkerler quqyqtarynyń qorǵalýyna kepil bolady. Memorandým aıasynda memlekettik qyzmet kórsetý men baqylaýda sybaılas jemqorlyq táýekelderine taldaý júrgizý josparlanýda. Sondaı-aq memlekettik jáne jergilikti atqarýshy organdardyń jeń ushyna jalǵasqan áreketterin áshkereleý úshin qyzmet etpek. 
Bul bastama Elbasynyń kásipkerlikti qoldaý jónindegi tapsyrmasy negizinde qolǵa alynyp otyr. Sondaı-aq osy kelisim arqyly bıznesti zańsyz ákimshilik qysymdardan jáne qylmystyq qýdalaýdan qorǵaýǵa jol ashylady. Memlekettik organdar tarapynan bıznes-tekserýlerdiń zańdylyǵyn taldaý jumystary júrgizilmek. Osynaý tekserýlerdiń nátıjesine súıene otyryp, tıisti prokýrorlyq sharalar qabyldanady.
Budan bólek, jer qatynastary men qurylys salasynda kásipkerlerge ruqsat berý qujattaryn ázirleý barysynda ákimdiktiń óz mindetterin tıisti atqarýyn qadaǵalaýǵa jol ashylady.
