Túrkistanda kásipkerler azyq-túlik taýarlaryn naryqtaǵy baǵadan tómen satty

TÚRKІSTAN. QazAqparat – Túrkistan oblysynda kásipkerlik jáne saýda basqarmasynyń bastamasymen aýyl sharýashylyq ónimderiniń jármeńkesi ótti. Atalǵan shara áleýmettik mańyzy bar azyq-túlik taýarlarynyń baǵasyn ósirmeý maqsatynda uıymdastyryldy, dep habarlaıdy QazAqparat tilshisi.

Jármeńkege Túrkistan qalasynyń kásipkerleri men Maqtaaral, Jetisaı, Shardara aýdandarynyń aýyl sharýashylyq taýar óndirýshileri qatysty. Sondaı-aq, «Túrkistan» áleýmettik – kásipkerlik korporatsııasy» AQ ókilderi arnaıy shaqyrylyp, olar da ózderiniń taýarlaryn satylymǵa shyǵardy. Jalpy quny 2 mln teńgeden astam 19,2 tonna bolatyn aýyl sharýashylyǵy ónimderi saýdalandy. Otandyq ónimder turǵyndarǵa bazar narqynan 15-20% tómen baǵada usynyldy.

Negizinen áleýmettik mańyzy bar azyq-túlik ónimderi satylǵan jármeńkege jurt kóp jınaldy. Kelýshilerdiń barlyǵy da arzandatylǵan otandyq ónimge qyzyǵýshylyq tanytty. Óńirde baǵalardy maýsymdyq qymbattatpaý maqsatynda uıymdastyrylǵan shara aldaǵy ýaqytta da turaqty túrde ótkizilip turatyn boldy.

Mamandar endi jármeńkeniń 22 aqpan men 7, 21 naýryzda jáne 4 sáýir kúnderi ótetinin aıtady.