Túrkistanda «Karl Baıpaqov - arheologııa sardary» kórmesi ashyldy
TÚRKІSTAN. QazAqparat – Túrkistan qalasyndaǵy orta mektepte «Karl Baıpaqov - arheologııa sardary» kórmesi ashyldy. «Áziret Sultan» memlekettik tarıhı-mádenı qoryq-mýzeıi ótkizgen kórme Karl Baıpaqovtyń 80 jyldyǵyna oraı uıymdastyryldy, dep habarlaıdy QazAqparat tilshisi.
Kórmege kelgen mektep muǵalimderi men joǵary synyp oqýshylary K.Baıpaqovtyń ǵylymı eńbekteri men ataqty arheolog jaıly jazylǵan estelik kitaptardy, ómiriniń ár kezeńinen syr shertetin sýretterdi tamashalady.
Shara barysynda qoryq-mýzeıdiń ekskýrsovody D.Saıdvakasov «Syry tereń Saýran» taqyrybynda lektsııa ótkizip, belgili arheologtyń birneshe jyl ortaǵasyrlyq Saýran qalasynda júrgizgen qazba jumystary jaıly áńgimeledi.
Basqosýda sondaı–aq, Qazaqstan Respýblıkasynyń Tuńǵysh Prezıdenti N.Á.Nazarbaevtyń «Bolashaqqa baǵdar: rýhanı jańǵyrý», «Uly dalanyń jeti qyry» baǵdarlamalyq maqalalaryn nasıhattaý aıasynda qolǵa alynǵan sharalar sóz boldy. Oqýshylar tarapynan qoıylǵan suraqtarǵa jaýaptar berildi.
