Túrkistanda qar qursaýynda qalǵan 92 adam qutqaryldy

TÚRKІSTAN. QazAqparat - Túrkistan oblysynda jaýǵan qalyń qar men qatty jeldiń zardaptaryn joıý jáne qutqarý jumystarynyń barysy boıynsha brıfıng ótti, dep habarlaıdy QazAqparat.

Túrkistan oblystyq Tótenshe jaǵdaılar departamentiniń basqarma basshysy Talǵat Dosalıevtyń aıtýynsha, óńirde 3 qańtar kúni ońtústik-batystan 15-20 m/s qatty jel turǵan. Taýly aýdandarda qar aralas jańbyr jaýyp, asýlarda jeldiń ekpini 30 m/s-tan asqan.

«Tólebı aýdany, Abaı aýyly Kemeqalǵan kóshesinde qatty jeldiń saldarynan ortasha qysymdy jer ústi gaz qubyryna aǵash qulap, 80 abonent gazsyz qaldy. Sonymen qatar, Qoshqar ata kóshesinde 100 abonent kógildir otynsyz qalǵan. Bul másele boıynsha «Qaztransaımaq» AQ qyzmetkerleriniń kómegimen gaz berý jumystary qalpyna keltirildi. Sondaı-aq, Arys qalasynda qar aralas jańbyrdyń tolassyz jaýýynan 20 turǵyn úıdiń aýlasyna sý kirgen. Tótenshe jaǵdaıdy qalpyna keltirý úshin oblystyq Tótenshe jaǵdaılar departamenti 1 tehnıka, 2 motopompa, 9 adam jumyldyrdy. Budan ózge, departamenttiń 25 qyzmetkeri, 5 tehnıkasy jumyldyrylyp Sozaq, Báıdibek aýdandarynda qar qursaýynda qalǵan 10 jeńil avtokólik, 2 jolaýshylar avtobýsy men 4 júk avtokóligi shyǵarylyp, 92 adam qutqaryldy», - dedi Talǵat Serikuly.
Sondaı-aq, Tótenshe jaǵdaılar departamenti tarapynan respýblıkalyq, oblystyq joldardy qardan tazartý úshin jalpy 133 adam, 74 tehnıka, al jergilikti mańyzy bar avtomobıl joldaryn qardan tazartý úshin jalpy 97 adam, 41 tehnıka kómekke jiberilgen.
Brıfıngke qatysqan oblystyq jolaýshylar kóligi jáne avtomobıl joldary basqarmasynyń basshysy Rolan Ibragımov aýa raıyna baılanysty sms habarlamalar kelgen jaǵdaıda turǵyndardyń uzaq jolǵa shyqpaýyn jáne tek resmı aqparattarǵa sený kerektigin jetkizdi.
«Qańtar aıynyń 1-4 aralyǵynda Tólebı, Túlkibas, Qazyǵurt, Sozaq, Saıram, Báıdibek, Saýran aýdandaryndaǵy oblystyq mańyzy bar joldardy qardan tazartý jumystary júrgizilýde. Qardy tazalaý, ınertti materıaldardy shashý jumystaryna 75 dana arnaıy tehnıka, 322 jumysshy jumyldyryldy. 4 qańtardaǵy málimet boıynsha qatty jaýǵan qardyń jáne burqasyn jel men boran saldarynan 8 oblystyq mańyzy bar jol ýaqytsha jabyldy. Qar qursaýynan 103 jeńil jáne júk kóligi, 110 adam shyǵaryldy»,- dedi basqarma basshysy.
Sonymen qatar, aýa raıynyń qolaısyzdyǵynan birneshe aýdannyń elektr jelilerine zaqym kelip, qazirgi tańda olardy qalpyna keltirý jumystary júrgizilip jatyr.
«3 qańtar kúni Sozaq, Báıdibek, Qazyǵurt, Saýran, Tólebı, Otyrar aýdandarynda elektr jelilerine zaqym kelgen.»Ońtústik Jaryq Tranzıt«JShS tarapynan 37 brıgada, 41 birlik tehnıka zalaldy qalpyna keltirý jumystaryn júrgizýde. Jumystardy jedeldetý maqsatynda zaqymdalǵan elektr jelilerin qalpyna keltirý boıynsha qosymsha brıgadalar jasaqtalý ústinde», - dedi oblystyq energetıka jáne turǵyn-úı kommýnaldyq sharýashylyq basqarmasy basshysynyń orynbasary Roza Sarıeva.

Foto: gov.kz