Túrkistanda kámeletke tolmaǵan balalarǵa zańsyz dinı sabaq ótkizgen adam anyqtaldy
Túrkistan oblysy Polıtsııa departamenti ekstremızmge qarsy is-qımyl basqarmasy men Túrkistan oblysy boıynsha Ulttyq qaýipsizdik komıtetiniń qyzmetkerleri birlesip, jedel is-sharalar ótkizý barysynda, kámeletke tolmaǵandarǵa zańsyz dinı sabaq bergen er adamdy anyqtady.
Túrkistan qalasynyń turǵyny úıinde 5 jastan 17 jasqa deıingi 68 balaǵa sabaq berip, dinı ýaǵyzdardy zańsyz nasıhattaǵan. Al oqý aqysy 100 myń teńgeni quraǵan. Kúdiktiniń mekenjaıy boıynsha tekserý júrgizý kezinde 68 bala dinı baǵyt boıynsha sabaq alǵany rastaldy. Sondaı-aq oqýshylar arasynda Túrkistan ǵana emes, Abaı, Shyǵys Qazaqstan, Jambyl oblystary men Ózbekstan Respýblıkasynyń balalary da bilim alǵany anyqtaldy.
Oǵan qosa polıtseıler jergilikti turǵynnyń úıinen saraptamaǵa baǵyttalǵan 100-den astam dinı sıpattaǵy kitaptardy tárkiledi. Er adamǵa qatysty QR ÁQBtK-niń 490-baby 3-bóligi (Qazaqstan Respýblıkasynyń dinı qyzmet jáne dinı birlestikter týraly zańnamasyn buzý) boıynsha ákimshilik hattama toltyryldy. Túrkistan oblysynyń polıtseıleri azamattarǵa zańsyz dinı qyzmetpen aınalysqany jáne dinı ádebıetterdi taratqany úshin jaýapkershilik qarastyrylǵanyn eskertedi.
