Túrkistanda «Kamaz» kóligi eski káriz qudyǵyna qulap ketti

TÚRKІSTAN. QazAqparat – Túrkistanda «Kamaz» kóligi qoldanystan shyqqan káriz qudyǵyna qulap ketti. Adamdar aman, dep habarlaıdy QazAqparat tilshisi.

Júk kóliginiń tereń shuńqyrǵa qulap ketkendigi týraly vıdeo áleýmettik jelide tarady. Adamdar qubyrdan aqqan sýdy óshirip, «Kamazdy» qudyqtan shyǵarýǵa tyrysady.

Bul oqıǵaǵa qatysty aqparat taratqan qala ákimdigi opyrylyp túsken jer burynǵy káriz qudyǵynyń orny ekendigin málim etti.

«Birinshi móltek aýdandaǵy 14 «b» úıdiń aýlasynda eski káriz qudyǵynyń orny anyqtaldy. Qazylǵan shuńqyr 2012 jylǵa deıin jataqhananyń káriz qudyǵy retinde paıdalanylyp kelgen. 2012 jyly ortalyq káriz júıesi iske qosylǵannan keıin, qoldanystan shyǵyp, orny tegistelgen. Qudyq betindegi beton jabyndysynyń tozyǵy jetip, aýyr júk kóliginiń salmaǵynan synyp ketken. Qazirgi tańda oqıǵa ornynda qalpyna keltirý jumystary tolyq aıaqtaldy», - delingen Túrkistan qalasy ákiminiń baspasóz qyzmeti taratqan habarlamada.