Túrkistanda qaltaǵa túsken uryny toqtatpaq bolǵan áıel taıaq jedi
ShYMKENT. QazAqparat - Túrkistan qalasynda qoǵamdyq kólikterdiń birinde jolaýshy áıel qalta urysynan taıaq jedi. Kelinshek urynyń avtobýstaǵy jolaýshylardyń biriniń uıaly telefonyn urlap jatqan sátin baıqap qalǵan. Al ony toqtatpaq bolǵan áıeldi álgi jigit uryp, oqıǵa ornynan qashyp ketken, dep habarlaıdy QazAqparat HAA tilshisi.
Osydan keıin jedel-izdestirý is-sharalaryn júrgizgen Túrkistan qalalyq ІІB qyzmetkerleri qoǵamdyq kólikterde qaltaǵa túsýmen aınalysady dep kúdik keltirilgen 32 jasar azamatty ustady.
Tergeý barysynda qolǵa túsken seziktiniń birneshe qalta túsý áreketine qastysy bar ekeni anyqtaldy. Buǵan deıin birneshe ret sotty bolǵan ol jymysqy áreketin negizinen qoǵamdyq kólikterde jasap júripti. Máselen, osy jyldyń sáýir aıynda qoǵamdyq kólikte ketip bara jatqan qyzdyń uqypsyzdyǵyn paıdalanyp, onyń uıaly telefonyn alyp qashyp ketken. Sóıtip ol jábirlenýshige 100 myń teńge kóleminde shyǵyn keltirgen. Arada apta ótkende kúdikti dál sol jolmen ózge bir jolaýshynyń uıaly telefonyn qoldy qylǵan. Qazirgi tańda seziktiniń ózge de qylmystarǵa qatystylyǵy anyqtalýda. Atalǵan jaıt boıynsha QR QK 188-baby «Urlyq» jáne 191-baby «Tonaý» negizinde qylmystyq is qozǵaldy. Kúdikti qamaýǵa alynyp, sotqa deıingi tergeý amaldary júrgizilýde.
