Túrkistanda ınvestorlar men kásipkerlerdi qoldaýǵa baǵyttalǵan joba júzege asyrylýda

Baspasóz málimetterine qaraǵanda, QR Memlekettik qyzmet isteri jáne sybaılas jemqorlyqqa qarsy is-qımyl agenttigi el ekonomıkasyna ınvestıtsııa quıý protsesin ońtaılandyrý, sondaı-aq ınvestorlardy qaǵazbastylyqtan ajyratý, sybaılas jemqorlyq faktilerinen saqtandyrý úshin «Protecting Business and Investments» jobasyn júzege asyryp jatyr.

Bul joba Agenttik pen Syrtqy ister, Investıtsııalar jáne damý mınıstrlikterimen ózara yntymaqtastyq memorandýmy negizinde jumys isteýde. Jobanyń basty maqsaty - bıznesti qorǵaý, bıznes-klımatty jaqsartý jáne memlekettik baqylaý-qadaǵalaý qyzmetin ońtaılandyrý rásimderin barynsha jeńildetý.

«Túrkistan oblysynda departament tarapynan búgingi tańda jalpy quny 240 mlrd. teńge bolatyn 5 iri ınvestorǵa qoldaý kórsetilip, tıisti jumystar atqarylýda. Atalǵan joba aıasynda ınvestorlar sybaılas jemqorlyq faktileriniń kez-kelgen kórinisterine jol bermeýge, qandaı da bir zańsyz fakt týyndaıtyn bolsa, tikeleı agenttikke jáne onyń aýmaqtyq departamentterine baıandaý týraly kelisimge qol qoıylady. Óz kezeginde sybaılas jemqorlyqqa qarsy is-qımyl salasyndaǵy ýákiletti organ kelisimge qol qoıǵan ınvestorlardy zańda belgilengen quzyretterdi jáne óz resýrstaryn paıdalana otyryp 100 paıyz sybaılas jemqorlyq faktilerinen 24/7 prıntsıpi negizinde, ıaǵnı kez kelgen ýaqytta qoldap, qorǵaıtyn bolady», - dedi QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Túrkistan oblysy boıynsha departament basshysynyń orynbasary, Ádep jónindegi Keńes hatshylyǵynyń meńgerýshisi Ǵanıjan Asanuly.

Jıyn sońynda departament basshysynyń orynbasary BAQ quraldarynyń birqatar suraqtaryna jaýap berip, otandyq jáne sheteldik kásipkerlerge óńirimizde qolaıly orta qalyptastyrý úshin barlyq jaǵdaı jasalyp, ákimshilik kedergiler bolmaý qajettigin atap ótti.