Túrkistanda ımamdar forýmy ótti

TÚRKІSTAN. QazAqparat – Túrkistan oblysy Saıram aýdany, Aqsýkent aýylynda «Jeti rýhanı qazyq» óńirlik forýmy bolyp ótti, dep habarlaıdy QazAqprat.

Sharany oblystyq Qoǵamdyq damý basqarmasynyń uıymdastyrdy. Maqsaty - elordada ótken ІІІ Respýblıkalyq ımamdar forýmynda qabyldanǵan «Jeti rýhanı qazyq» tuǵyrnamasyn nasıhattaý, ımamdardyń biliktiligin arttyrý, dinaralyq tatýlyq pen toleranttylyqty qoldaý jáne din máselesine qatysty qaqtyǵystardyń, dinı ekstremızm men terrorızmniń aldyn alý baǵytyndaǵy jumystarǵa taldaý-talqylaý júrgizý.

Forýmǵa qatysqan ımamdar ózara tájirıbe almasyp, ońdy pikirlerin ortaǵa saldy.

Sharany Qoǵamdyq damý basqarma basshysynyń orybasary Qaırat Ábýov ashyp, júrgizip otyrdy. «Qoǵamnyń turaqtylyǵyn saqtap, dinı qaqtyǵystaryń aldyn alýda mundaı basqosýlardyń mańyzy zor»,- degen ol, qatysýshylarǵa alǵysyn bildirdi.

Oblystyq forýmnyń arnaıy qonaqtary Qazaqstan Musylmandary dinı basqarmasy tóraǵasynyń orynbasary, naıb mýftı Ershat Ońǵarov, belgili ıslamtanýshy, QMDB Ǵulamalar keńesiniń múshesi Ersin Ámire, QMDB Túrkistan oblysy boıynsha ókil ımamy – Aqtamberdy Musabek sharanyń maqsatyna saı mańyzdy máselelerdi qozǵap, oı bólisti.

Túrkistan oblysyna qarasty barlyq aýdan, qalalardyń bas ımamdary qatysqan forýmnyń jumysy naqty maqsattar men mindettemelerdi aıqyndaýmen erekshelendi. Qatysýshylarǵa sertıfıkattar tabystaldy.