Túrkistanda Hilton qonaqúıiniń alǵashqy jelisi ashyldy
NUR-SULTAN. QazAqparat - Túrkistan qalasynda Hilton qonaqúıiniń alǵashqy jelisi Hampton by Hilton Turkistan qonaqúıiniń resmı ashylýy ótti, dep habarlaıdy oblystyq ákimdiktiń baspasóz qyzmeti.
Halyqaralyq qonaqúıdiń ashylýyna Túrkistan oblysy ákiminiń birinshi orynbasary Arman Jetpisbaı, Túrkistan qalasynyń ákimi Rashıd Aıýpov pen BI Group Dırektorlar keńesiniń tóraǵasy Aıdyn Rahymbaev qatysty.
«Bul eń aldymen strategııalyq mańyzdy salaǵa úlken úles. Týrızmdi damyta otyryp, Túrkistanǵa kelgen qonaqtar halyqaralyq deńgeıdegi qyzmetti qoljetimdi baǵamen paıdalana alady. Sonymen qatar, qonaqúı Túrkistannyń mádenı-rýhanı ortalyǵyna úılesimdi», - dedi quttyqtaý sózinde Túrkistan oblysy ákiminiń birinshi orynbasary Arman Jetpisbaı.
Qonaqúı Túrkistannyń mádenı-rýhanı ortalyǵynda ornalasqan. ıAsaýı kesenesi jaqyn, Uly Dala ortalyǵy men Visit Centre Turkistan mańaıynda ornalasqan. Syrtqy beti kóne ǵasyrdyń ǵımarattaryn eske túsiretin Marokko stılindegi eski qam kirpishten soǵylǵan. Orta ǵasyr men qazirgi dástúrlerdi sátti úılestire otyryp, qalanyń stılin tolyqtyra túsken. Bir jyldyń ishinde boı kótergen qonaqúıdiń jalpy alańy Top Tobe jeke banket keshenin qosqanda 9000 sharshy metrdi quraıdy. Standartty sanattaǵy 120 nómir bar. Múmkindigi shekteýli adamdarǵa arnaıy jasaqtalǵan bólmeler qarastyrylǵan.
Hilton – quramyna ártúrli sanattaǵy 17 qonaqúı brendi kiretin dúnıe júzine áıgili qonaqúıler jelisi. Álem boıynsha bul jelige 6000-ǵa jýyq qonaqúı kiredi. Hampton by Hilton Turkistan – BI Group pen Hilton Worldwide arasyndaǵy ekinshi birlesken joba. Holdıng Nur-Sultan qalasynda 2017 jyly Hilton Astana qonaqúıin saldy.
