Túrkistanda Halyqaralyq sýretshiler pleneri ótti
ShYMKENT. QazAqparat - Túrkistan oblysynda «Kaskasu» Halyqaralyq sýretshiler pleneri qorytyndylandy. Sharanyń saltanatty jabylý rásimine oblys ákimi Janseıit Túımebaev arnaıy qatysyp, plenerge qatysqan qylqalam sheberlerin marapattady, dep habarlaıdy QazAqparat.
Aımaq basshysy sýretshilerdiń apta boıy salǵan sýretterin tamashalap, óner ıelerine shyǵarmashylyq tabys tiledi.
«Bul sharaǵa álemniń ár túkpirinen kelgen ataqty sýretshilerdiń týyndylary Túrkistan oblysynyń kórkemsýret qoryn tolyqtyrýǵa óz septigin tıgizeri sózsiz. Halyqaralyq deńgeıdegi belgili qylqalam sheberleriniń osy aptalyqtaǵy shyǵarmashylyq izdenisinen qundy óner týyndysy tabylady dep senem. Atalǵan sharany uıymdastyrýdyń basty maqsaty - Túrkistan óńiriniń ózindik tabıǵı geografııalyq erekshelikterin jáne kóz tartarlyq oryndaryn beıneleıtin halyqaralyq deńgeıdegi óner shyǵarmalaryn jasap, olardy álemdik deńgeıde tanytý, sol arqyly týrızmdi damytýǵa úles qosý», - dedi Janseıit Túımebaev.
Aıta keteıik, halyqaralyq sýretshiler pleneri 22-27 shilde aralyǵynda oblys ákimdiginiń bastamasymen jáne oblystyq Mádenıet jáne tilderdi damytý basqarmasynyń, Tóle bı aýdany ákimdiginiń uıymdastyrýymen ótkizildi.
Jıynǵa Túrkııa, Qyrǵyzstan, Reseı, Ózbekstan, Ázerbaıjan elderinen jáne respýblıkamyzdyń Astana, Almaty, Oral, Aqtóbe, Atyraý, Pavlodar, Qaraǵandy, Taraz qalalarynan, sondaı-aq, Túrkistan oblysynyń arnaıy bilimi bar kásibı 24 sýretshi qatysty. Qylqalam sheberleri bir aptanyń ishinde on aýdandy aralap, ondaǵy birqatar tarıhı - mádenı oryndarda boldy. Sondaǵy kórinisterdi qaǵaz betine túsirdi.
