Túrkistanda halyqaralyq Qazaqstan-Polsha bıznes-forýmy ótti
TÚRKІSTAN. QazAqparat - Túrkistanda tuńǵysh ret «Túrkistan: polshalyq bıznes úshin jańa múmkindikter» atty halyqaralyq Qazaqstan-Polsha bıznes-forýmy ótti, dep habarlaıdy QazAqparat tilshisi.
Sheteldik delegattar quramynda ekonomıka, aýyl sharýashylyǵy, telekommýnıkatsııa jáne mashına jasaý salalarynda qyzmet etetin 20-ǵa jýyq kásipker men kompanııa ókilderi boldy.
Delegatsııany Polshanyń Qazaqstandaǵy Tótenshe jáne Ókiletti Elshisi Selım Hazbıevıch bastap keldi. «Túrkistan» ÁKK» AQ-nyń fılıaly «Turkistan Invest» kompanııasy uıymdastyrǵan forým aıasynda taraptar birlesip júzege asyratyn jobalar, eksport pen ımportqa qatysty máseleler jaıyn sóz etti.
«Bul bıznes-forým eki eldiń naryqtaǵy jaǵdaıyn jaqsartýǵa, sonymen qatar, Polsha men Túrkistan oblysy arasyndaǵy saýda-ekonomıkalyq damýdyń jańa joldaryn aıqyndaýǵa úlken úlesin qosady. Ortalyq Azııaǵa jol ashatyn Qazaqstan Eýropa men Azııa úshin mańyzdy rólge ıe. Eýropalyq Odaq naryǵyna jeteleıtin Polsha da sizder úshin týra sondaı mańyzdy el bolyp tabylady. Qazaqstan men Polsha - ınvestıtsııalyq baılanys boıynsha da jaqsy áriptes elder»,- deıdi «Investıtsııa jáne saýda boıynsha polshalyq agenttik» AQ sheteldik saýda ofısiniń basshysy ıÝlııa Gorodetskaıa.
«Túrkistan» ÁKK» AQ fılıaly «Turkistan Invest» kompanııasynyń málimetinshe, kezdesý barysynda óńirge aýyl sharýashylyǵy salasyndaǵy polshalyq tehnologııalardy endirý týraly usynystar aıtylǵan. Sheteldik kásipkerler ásirese sý, sút jáne suıyq maıdy quıý boıynsha bıznesterdiń daıyn nusqalaryn tanystyrdy. Qonaqtar jergilikti sharýalardy qajetti qural-jabdyqtarmen qamtamasyz etipqana qoımaı, olardy oqytý jáne úıretýge daıyn ekendikterin jetkizdi.
«Bizde aýyl sharýashylyǵy salasynda óndiriletin ónim kólemi óte joǵary. Túrkistan oblysynda agroónerkásiptik keshendi damytý boıynsha baǵdarlama sátti júzege asýda. Sondyqtan da biz eksportqa shyǵaratyn ónimderdi usyna alamyz»,- deıdi «Túrkistan» ÁKK» AQ-nyń fılıaly «Turkistan Invest» dırektory Narıman Ilıasov.
Shara barysynda sondaı-aq eki eldiń kásipkerleri V2V formatyndaǵy kezdesýler uıymdastyrdy. Nátıjesinde taraptar yntymaqtastyqty ary qaraı damytýǵa ýaǵdalasyp, ony nyǵaıtýǵa baǵyttalǵan birqatar qujattarǵa qol qoıdy. Forýmǵa qatysýshylar bul basqosýdyń qos elge de tıimdi bolatyndyǵyna jáne jemisti nátıjeler beretindigine senim bildirdi.
Aıta keteıik, Qazaqstan men Polsha arasyndaǵy taýar aınalymy búginde 1 mlrd AQSh dollarynan astam somany qurap otyr. Elimizge polıaktar farmatsevtıkalyq, kosmetıkalyq ónimder men qantty tasymaldaıdy. Al, Qazaqstannan mıneraldyq ónimder men kómir, bıdaı eksporttalady. Elde 200-den astam polshalyq kompanııa qyzmet etedi.
