Túrkistanda halyqaralyq áýejaıdyń irgetasy qalandy

TÚRKІSTAN. QazAqparat - Búgin QR Premer-Mınıstri Asqar Mamın Túrkistan oblysyna arnaıy is-saparmen bardy. Úkimet basshysynyń sapary barysynda oblys ortalyǵynda boı kóteretin halyqaralyq áýejaıdyń irgetasy qalandy. Saltanatty rásimge QR Premer-Mınıstri Asqar Mamın, Túrkistan oblysynyń ákimi Ómirzaq Shókeev jáne BAQ ókilderi qatysty, dep habarlaıdy QazAqparat tilshisi.

Asqar Mamın jınalǵan kópshilikti áýejaıdyń irgetasy qalanýymen quttyqtap, halyqaralyq mańyzy bar nysandy ýaqytyly paıdalanýǵa berý qajettigin atap ótti. Óz kezeginde áýejaıdyń qurylysyn salatyn kompanııa basshysy Arslan Hýseın Úkimet basshysyna termınaldyń halyqaralyq jáne ishki reısterde saǵatyna 250 adam qabyldaýǵa qaýqarly ekenin jetkizdi.

Aıta keteıik, Túrkistan qalasyndaǵy jańa áýejaıdyń qurylysyn túrkııalyq ınvestorlar júrgizedi. Merdiger mekeme - týrkııalyq «IDA INShAAT SANAII VE TIDJARET ANONIM ShIRKETI» (YDA INŞAAT SANAYI VE TICARET ANONIM ŞIRKETI) kompanııasy. Halyqaralyq áýejaı Túrkistan qalasynan 16 shaqyrym qashyqtyqta ornalasqan. 900 gektar aýmaqqa termınal, ushý-qoný jolaǵy jáne basqa da nysandar salý josparlanyp otyr. Halyqaralyq áýejaı 2020 jyldyń jeltoqsan aıynda paıdalanýǵa beriledi dep kútilýde.

Eske salaıyq, jańadan qurylǵan Túrkistan oblysynyń ortalyǵynda tuńǵysh ret halyqaralyq áýejaı salynbaq. Onyń qurylysyna eń úzdik qazaqstandyq jáne sheteldik sarapshylar tartylmaq. Qurylys barysynda ındýstrııasynyń jańa jetistikterin paıdalaný josparlanyp otyr.