Túrkistanda halyq sanynyń kóbeıýine baılanysty nanǵa suranys artty
TÚRKІSTAN. QazAqparat - Túrkistan oblysynyń ákimi Janseıit Túımebaev oblys ortalyǵyndaǵy birqatar kásipkerlik nysandardy aralap, ondaǵy atqarylyp jatqan jumystarmen tanysty. Qaladaǵy naýbaıhanalardy aralap kórdi, dep habarlaıdy QazAqparat tilshisi.
Aımaq basshysy aldymen «ıAssy-nan» JShS-ne taban tiredi. 4 jyl buryn iske qosylǵan naýbaıhana búginde táýligine 13,7 tonna ónim shyǵarady. Nan zaýytynda 100 adam turaqty jumyspen qamtylǵan. Qazirgi tańda munda nannyń 40 túri, shujyqtyń 15 túri shyǵarylady. Kásiporyn basshysy Nasıba Ataeva as atasyna suranys artýyna baılanysty ónim kólemin kóbeıtýge bel baılaǵanyn aıtady.
«Bul naýbaıhana bastapqyda belgili bir kásiporyn jumysshylaryn nan ónimderimen qamtamasyz etý úshin qurylǵan edi. Ýaqyt óte kele qalada bizdiń ónimge degen suranys kúrt artty. Nátıjesinde ónim kólemin táýligine 30 myń danadan 50 myńǵa shyǵaryp otyrmyz. Osyǵan oraı jańa jumys oryndary ashylyp, naýbaıhanamyzdyń óndiristik qýaty men aýmaǵy meıilinshe ulǵaıdy», - dedi Nasıba Sabyrqyzy.
Búginde kásipker óz esebinen jobaǵa qosymsha 800 mln teńge qarjy quıyp, Cheh Respýblıkasynan nan jabýǵa arnalǵan zamanaýı qondyrǵylar satyp alǵan. Osylaısha seriktestik oblys ortalyǵyn nan ónimderimen tolyq qamtamasyz etip, baǵa turaqtylyǵyn saqtap otyr.
Aımaq basshysy sondaı-aq, qurylys zattaryn shyǵarýmen aınalysatyn «ıAssy-qurylys» jaýapkershiligi shekteýli seriktestigine de aıaldady. Oblys ákimi zaýyt jumysshylarymen kezdesip, otandyq kásiporynnyń ónim shyǵarý áleýetimen keńinen tanysty. 2012 jyly qurylǵan seriktestikte qazirgi tańda óndiris ornynda 120 adam jumys isteıdi. Zaýyt jylyna 138 myń tonna temir beton buıymdaryn shyǵaryp, ishki naryqty otandyq qurylys zattarymen qamtamasyz etip otyr.
