Túrkistanda «Halyq saqshylary» jasaǵy quryldy

TÚRKІSTAN. QazAqparat – Túrkistan qalasynda «Halyq saqshylary» jasaǵy quryldy. Bul týraly oblys ákimdigi resmı málimet taratty, dep habarlaıdy QazAqparat tilshisi.

Búginde oblys ortalyǵynda qala ákimdigi, máslıhat depýtattary, sektor meńgerýshileri, polıtsııa ókilderi qatarynan jedel shtab qurylǵan. Ákimdiktiń qyzmetteri táýlik boıy kezekshilikke tartylyp, tıisti jumystar atqarýǵa kiristi. Ákimdikte qurylǵan jedel shtab kúndelikti 20:00-de májilis ótkizip, naqty áreket etý josparlaryn talqylap otyr. Turaqtylyqty qamtamasyz etý baǵytynda jınalys barysynda ózara mindetter tapsyrylyp, jańa baǵyttar belgilenýde. Halyq kóp shoǵyrlanatyn oryndarda dybys kúsheıtkish arqyly turaqty túrde tótenshe jaǵdaı talaptary túsindirilip, tártipke baǵyný týraly úndeýler jarııalandy. Internet baılanysy buǵattalýyna oraı, turǵyndardy barynsha saqtandyrý maqsatynda arnaıy aqparattyq paraqshalar ázirlenip, belsendiler arqyly 10 myńnan astam aqparattyq paraqshalar taratyldy. Túrkistan qalasynyń vokzalyna kelip toqtaǵan úsh poıyzdyń jolaýshylaryna Túrkistan qalasy ákimdigi tarapynan ystyq tamaq uıymdastyrylyp, qajetti azyq-túlikpen qamtamasyz etildi jáne 108 asyǵys azamatqa qoǵamdyq kólikter uıymdastyrylyp baratyn eldi mekenderine jiberildi. Qala ákiminiń tóraǵalyǵymen medıtsına salasy qyzmetkerlerimen arnaıy jınalys ótip, kún tártibine sáıkes aýrýhana qyzmetin kúsheıtilgen rıjimge aýystyrý daıyndyǵy pysyqtaldy. Bilim salasynyń qyzmetkerlerimen arnaıy jınalys ótkizilip, balalardyń qaýipsizdigin qamtamasyz etý boıynsha ata-analarmen baılanys ornatý tapsyryldy. Komendanttyq rejım talaptary túsindirilip, bilim nysandaryndaǵy saqtyq sharalary qolǵa alynǵan. Jergilikti bılik ókilderi qoǵam belsendilerimen, jastarmen arnaıy jıyn ótkizip, qala aýmaǵynda tártipti saqtaý men komendanttyq rejımge baǵyný máseleleri túsindirilýde. Ákimdik qyzmetkerleri men máslıhat depýtattary ózderine bekitilgen aýmaqtarda táýlik boıy baqylaý men aralaý jumystaryn júrgizýde. Qala aýmaǵynda turǵyndardyń qaýipsizdigi men tynyshtyǵyn kúzetý úshin tótenshe jaǵdaı talabyna sáıkes qalaǵa kiretin jáne shyǵatyn 5 jol baqylaýǵa alynyp, arnaıy blok beketter ornatyldy. Shatyrlarmen qamtylyp, erejege saı jumys atqarýda.