Túrkistanda gıdterge arnalǵan semınar-trenıng ótýde
TÚRKІSTAN. QazAqparat - Túrkistan oblysynyń týrızm basqarmasynyń «Turkistan Tourism Center» týrıstik aqparattyq ortalyǵy 11-23 aqpan aralyǵynda áleýetti gıd-ekskýrsovodtarǵa semınar-trenıng ótkizýde, dep habarlaıdy QazAqparat aımaq basshysynyń baspasóz qyzmetine silteme jasap.
Oqýdyń maqsaty oblystyń týrıstik obektilerimen tanysýdyń kásibılik sapasyn arttyrý jáne bizdiń óńirge keletin qonaqtar jáne týrıstermen jumys isteıtin gıd-ekskýrsovodtardyń biliktiligin arttyrý men daıyndaý bolyp tabylady.
Aımaqtyń tarıhyn, til tarıhyn, qazaq halqynyń mádenıeti men dástúrin biletin kásibı gıd-ekskýrsovod bul oblysqa kelýshi qonaqtarǵa alǵashqy áser qaldyratyn tulǵalardyń biri.
Óz kezeginde, semınarǵa qazaq, orys, túrik, aǵylshyn tilderin jetik meńgergen 50 joǵary kýrs stýdentterin oqytý jáne olardy bolashaqta kásibı gıd-ekskýrsovod retinde jyljytý, gıdterdi respýblıkalyq biryńǵaı tizimge tirkeý josparlanýda.
Tálim alyp jatqan qatysýshy gıd-ekskýrsovodtar bilimin jetildirý úshin týrızm salasyna eńbek sińirgen, tarıh ǵylymdarynyń doktory, professor Qoja Muqtar Baqadyruly jáne jattyqtyrýshy gıd-ekskýrsovod, dotsent Rahımbekova Maıra Jumaǵalıqyzynan dáris alýda.
Semınar-trenıngtiń maqsaty - óńirdiń týrıstik nysandary týraly aqparatty sapaly usyný, bilikti kadrlardy ulǵaıtý, týrıstik ındýstrııa salasynda adamı resýrstardy damytý, marshrýttardy durys josparlaý, gıd-ekskýrsovod qyzmetiniń sapasyn arttyrý.
