Túrkistanda gaz júıesindegi aqaý qalpyna keltirildi
Jeltoqsan aıynyń basynda Túrkistan qalasynda gaz qubyrynan aqaý shyǵyp, 200-ge jýyq abonent jylýsyz qalǵan bolatyn. Búginde mamandar qubyrdaǵy aqaýdy qalpyna keltirip, turǵyndardy gazǵa qosý jumystaryn atqaryp jatyr.
«Kúnniń kúrt sýyna baılanysty gaz tutyný kólemi ulǵaıdy. Gaz júıesi tolyǵymen qysqy rejımge aýysty. «Remzavod» móltekaýdanyndaǵy 200-ge jýyq úı gazǵa qosyldy. «Intergaz» mekemesinde 14 brıgada jumys istep jatyr. Qazir ákimshilik iskerlik ortalyq aýmaǵy men «Bekzat» móltek aýdanyndaǵy úılerdi gazǵa qosyp jatyr»- dedi «QazTransGaz Aımaq» AQ Túrkistan oblysy óndiristik fılıaly dırektorynyń birinshi orynbasary Erjan Balabekov.
Al, Túrkistan qalasy ákiminiń orynbasary Baıdýlla Orazbekov 104 qyzmeti tutynýshylardan túsken ótinimdermen toqtaýsyz jumys istep jatqanyn jetkizdi.
«Qala aýmaǵyndaǵy keı kóshelerdegi úılerde gaz óship qalǵan. Qazir 104 qyzmeti ár úıge baryp, gazǵa qosýda» - dedi ol.
Qazirgi kezde Túrkistan qalasyna saǵatyna 80 000 m3/ tabıǵı gaz kelip tur.
Aıta keteıik, keshe Túrkistan qalasynda gaz qubyryndaǵy qysym tómendep, 200-ge jýyq úı jylýsyz qalǵanyn jazǵan bolatynbyz.
