Túrkistanda fıtnes ortalyǵynyń irgetasy qalandy
TÚRKІSTAN. QazAqparat - Túrkistan oblysynyń ortalyǵy - Túrkistan shaharynda «Fıtnes ortalyǵy» ǵımaratynyń irgetasyn qalaý rásimi ótti. Saltanatty sharada aımaq basshysy Janseıit Túımebaev osynaý boı kóteretin nysannyń keleshekte túrkistandyqtardyń salaýatty ómir saltyn ustanýǵa septigin tıgizetinine senim bildirdi, dep habarlaıdy QazAqparat tilshisi.
Oblys ákiminiń sózinshe, eńseli fıtnes sport klýby salynyp bitkende jańadan jańǵyryp jatqan Túrkistannyń sáýlettik kelbetine odan ári sán beredi.
"Eldiń eńsesi bıik bolyp, qýatty el ataný úshin salaýatty ómir saltyn ustaný - barshaǵa mindet. Sebebi, densaýlyǵy myqty, oıy sergek azamattar ǵana memlekettiń qýatyn eseleıdi. Al, densaýlyq myqty bolsyn desek, sportty serik etý qajet. Salaýatty ómir saltynyń bir tetigi - fıtnespen shuǵyldaný. Búgin Túrkistan qalasynda irgetasy qalanǵaly otyrǵan «Fıtnes Palas» fıtnes ortalyǵy qala turǵyndary men qonaqtary úshin eń súıikti oryndardyń birine aınalady dep senemin. Fıtnes ortalyǵynda eresekterge arnalǵan basseın, erler men áıelderge arnalǵan jeke saýnalar men SPA-keshender, álemdik deńgeıdegi jattyǵý qurylǵylarymen jabdyqtalǵan zal ashylady. Munda táýligine 4 myń adamǵa deıin jattyǵý jasaı alady", - dedi Janseıit Túımebaev.
Aýmaǵy 11 200 sharshy metrdi quraıtyn zamanaýı fıtnes ortalyq jeke ınvestor «HEDÝEI Korporatsııasy» JShS esebinen boı kóteredi. 100 birlik jattyǵý qurylǵysy bar nysannyń 25 metrlik basseıni men 7 qabatty tazalaý júıesi bar. Bul jerde aıyna 500 toptyq baǵdarlamadan turatyn 40 fıtnes baǵyttary uıymdastyrylady. Sport ortalyǵynda Hammer Strength, HOIST, TECHNOGYM syndy belgili kompanııalardyń qurylǵylary ornatylǵan. Aıta keteıik, nysan 2019 jyly qoldanysqa beriledi dep josparlanǵan.
