Túrkistanda «fıstashkı» ósiriletin bolady
Túrkistanda tabıǵattyń tosyn qubylystaryna boı bermeıtin, adam men ań-qusqa kóleńkesimen saıa bolatyn jańa aǵash-buta túrlerin jersindirý jumystary júrip jatyr. Sonyń biri - «fıstashkı». Mamandardyń sózinshe, tek Jerorta teńizi, Soltústik-Batys Afrıka, Shyǵys Azııa elderi men Kavkaz taýlarynda kezdesetin bul ósimdik aldaǵy jyldary Túrkistanda jemis beretin bolady.
«Taýpiste Túrkistan oblysynda «Saıram – Ógem» memlekettik ulttyq tabıǵı parkiniń Túlkibas fılıaly aýmaǵynda kóp jyldan beri ósip tur. 2021 jyldyń kúz aıynda 5 keli taýpiste tuqymy jınalyp, tájirıbe retinde stratıfıkatsııaǵa qoıylǵan bolatyn. Endi búrshik jara bastaǵan taýpiste dánin 2022 jyldyń kókteminde «Jasyl aımaq» KMM-niń ǵylymı qyzmetkerleri «Eski áýejaı» ýchaskesine egip kórdi. Nátıjesi jaman emes. Egilgen taýpiste dániniń ónimdiligi 65 paıyzǵa jetti. Bul – mıkroklımaty qurǵaq Túrkistan qalasy úshin óte jaqsy kórsetkish, – deıdi «Jasyl aımaq» kommýnaldyq memlekettik mekemesiniń aǵa ǵylymı qyzmetkeri Tólebı Muhtaruly.
Foto: Túrkistan oblysy ákimdigi
