Túrkistanda fermerler aýyl sharýashylyǵy salasyna baǵyttalǵan kómek jaıyn sóz etti
ShYMKENT. QazAqparat -«Qazaqstannyń Fermerler odaǵy» respýblıkalyq qoǵamdyq birlestigi Ońtústik Qazaqstan oblystyq fılıalynyń ókilderi Túrkistanda kóshpeli jıyn ótkizdi.
Basqosýda aımaqtaǵy sharýalardyń aýyl sharýashylyǵy salasyndaǵy jetistikteri sóz boldy, dep habarlaıdy QazAqparat tilshisi.
Alqaly jıynda sóz alǵandar elimizde aýyl sharýashylyǵy salasyna baǵyttalǵan kómek jaıyn sóz etti. «100 naqty qadam» Ult jospary men 5 ınstıtýtsıonaldy reforma aıasynda atqarylǵan sharýalardy saralady. Byltyrdan bastap, qolǵa alynǵan agroónerkásip keshenin damytýdyń 2017-2020 jyldarǵa arnalǵan baǵdarlamasy bolsa, óz tıimdiligin dáleldep otyr. Buǵan sáıkes, aýdanda 83 aýyl sharýashylyq kooperatıvi tabysty jumys isteýde. Onda 2 myńǵa jýyq usaq sharýa qojalyqtarynyń ortaq múddesi toǵysqan. Qazir qalaǵa qarasty aýyl-aımaqtar «Bıznestiń jol kartasy-2020» baǵdarlamasynan mol sharapat kórýde. Deıturǵanmen, qarapaıym halyqtyń aýyl sharýashylyǵy tehnıkalaryn jańartý, agrohımııa salasyn damyta otyryp, tuqym sharýashylyǵyn qolǵa alýda biliktiligi jetkiliksiz. Sol sebepti Fermerler odaǵy osy jáne ózge de ózekti problemalar boıynsha keńinen túsindirý jumystaryn júrgizdi. Qarapaıym sharýalardyń kúndelikti kezdesip jatatyn problemalaryna qatysty saýaldaryna jaýaptar berdi.
